തൃശൂര്‍: സദാചാര ഗുണ്ടാ ആക്രമണത്തില്‍ പരുക്കേറ്റ് ചികിത്സയിലായിരുന്ന ബസ് ഡ്രൈവര്‍ മരിച്ചു. ചിറയ്ക്കല്‍ കോട്ടം മമ്മസ്രയില്ലത്ത് ഷംസുദ്ദീന്റെ മകന്‍ സഹാര്‍(32) ആണ് മരിച്ചത്. തൃശ്ശൂര്‍ തൃപ്രയാര്‍ റൂട്ടിലോടുന്ന സ്വകാര്യബസിലെ ഡ്രൈവറാണ് സഹാര്‍.

കഴിഞ്ഞമാസം പതിനെട്ട് അര്‍ധരാത്രിയിലായിരുന്നു സുഹൃത്തിന്റെ വീട്ടിലെത്തിയ ഇയാളെ ഒരുസംഘം ആക്രമിച്ചത്. സംഭവത്തിനുശേഷം വീട്ടിലെത്തിയ സഹാര്‍ വേദനകൊണ്ട് നിലവിളിച്ചതോടെയാണ് വീട്ടുകാര്‍ വിവരമറിയുന്നത്. തുടര്‍ന്ന് മാതാവും ബന്ധുക്കളും യുവാവിനെ ആശുപത്രിയിലെത്തിക്കുകയായിരുന്നു. ഗുരുതരമായി പരുക്കേറ്റ യുവാവ് ദിവസങ്ങളായി തൃശ്ശൂരിലെ ആശുപത്രിയില്‍ ചികിത്സയിലായിരുന്നു.

പ്രതികളായ ആറു പേരും ഒളിവിലാണ്. ഇതില്‍ ഒരാള്‍ വിദേശത്തേക്ക് കടന്നതായും പൊലിസ് സംശയിക്കുന്നുണ്ട്.