പാരീസ്: പാംപ്യന്‍സ് ലീഗിന്റെ ക്വാര്‍ട്ടര്‍ ഫൈനലില്‍ പി.എസ്.ജിയുടെ ഹോം ഗ്രൗണ്ടില്‍ വിജയക്കൊടി പാറിച്ച് ബാഴ്‌സ. കഴിഞ്ഞ ദിവസം നടന്ന മത്സരത്തില്‍ 3-2 എന്ന സ്‌കോറിനായിരുന്നു ബാഴ്‌സയുടെ ജയം. ബ്രസില്‍ താരം റഫീഞ്ഞയുടെ ഗോളായിരുന്നു ബാഴ്‌സലോണക്ക് കരുത്തായത്. 37,62 മിനുട്ടുകളിലായിരുന്നു റഫിഞ്ഞയുടെ ഗോളുകള്‍. 77ാം മിനുട്ടില്‍ ക്രിസ്റ്റന്‍സനും ബാഴ്‌സക്കായി ലക്ഷ്യം കണ്ടു. 48ാം മിനുട്ടില്‍ ഒസ്മാന്‍ ഡെംബലെയും 50ാം മിനുട്ടില്‍ വിറ്റിഞ്ഞയുമാണ് പി.എസ്.ജിക്കായി ഗോളുകള്‍ കണ്ടെത്തിയത്.

 പി.എസ്.ജിയുടെ തട്ടകത്തില്‍ മികച്ച നീക്കങ്ങളുമായി ബാഴ്‌സലോണ ആത്മവിശ്വാസത്തോടെയാണ് തുടങ്ങിയത്. 37ാം മിനുട്ടില്‍ വലതുവിങ്ങില്‍ നിന്ന് ലാമിന്‍ യമാല്‍ നല്‍കിയ ക്രോസിലൂടെയായിരുന്നു ബാഴ്‌സയുടെ ആദ്യ ഗോള്‍ പിറന്നത്. ആദ്യ പകുതി ബാഴ്‌സയുടെ ലീഡില്‍ അവസാനിച്ചെങ്കിലും രണ്ടാം തുടക്കത്തില്‍ തന്നെ പി.എസ്.ജി ഗോള്‍ മടക്കി സമനില കണ്ടെത്തി. 48ാം മിനുട്ടില്‍ മികച്ചൊരു ഷോട്ടിലൂടെ ഡംബാലെ ബാഴ്‌സയുടെ വല കിലുക്കി മത്സരം സമനിലയിലാക്കി.

ഇതോടെ പി.എസ്.ജിയുടെ കരുത്ത് വര്‍ധിച്ചു. അധികം വൈകാതെ 50ാം മിനുട്ടില്‍ പി.എസ്.ജി രണ്ടാം ഗോളും നേടി ലീഡാക്കി മത്സര നിയന്ത്രണം ഏറ്റെടുത്തു. ഒരു ഗോള്‍ വഴങ്ങിയതോടെ ബാഴ്‌സലോണ ഗോള്‍ മടക്കി മത്സരത്തിലേക്ക് തിരിച്ചുവന്നു. 61ാം മിനുട്ടില്‍ റഫിഞ്ഞ തന്നെയായിരുന്നു രണ്ടാം ഗോളും നേടിയത് തുടര്‍ന്ന് 76ാം മിനുട്ടില്‍ പകരക്കാരനായി കളത്തിലെത്തിയ ക്രിസ്റ്റന്‍സന്‍ ബാഴ്‌സയുടെ വിജയഗോളും നേടി. ഇല്‍ക്കായി ഗുണ്ടോഗന്‍ എടുത്ത ഫ്രീ കിക്ക് ക്രിസ്റ്റന്‍സന്‍ ഹെഡറിലുടെ വലയിലെത്തിക്കുകയായിരുന്നു.

17ന് ബാഴസയുടെ മൈതാനത്താണ് രണ്ടാം പാദ മത്സരം. മറ്റൊരു ക്വാര്‍ട്ടറില്‍ അത്‌ലറ്റിക്കോ മാഡ്രിഡ് ഒന്നിനെതിരേ രണ്ട് ഗോളുകള്‍ക്ക് ജര്‍മന്‍ ക്ലബ്ബ് ബൊറൂസിയ ഡോര്‍ട്ട്മുണ്ടിനെ തോല്‍പ്പിച്ചു. റോഡ്രിഗോ ഡി പോള്‍ (4), സാമുവല്‍ ലിനോ (32) എന്നിവരായിരുന്നു അത്‌ലറ്റിക്കോക്ക് വേണ്ടി ഗോള്‍ നേടിയത്. 13ാം മിനുട്ടില്‍ സെബാസ്റ്റന്‍ ഹാളറിന്റെ വകയായിരുന്നു ഡോര്‍ട്മുണ്ടിന്റെ ആശ്വാസ ഗോള്‍.