ഡല്‍ഹി: 3000 കോടി രൂപ കടമെടുക്കാന്‍ സംസ്ഥാനത്തിന് അനുവാദം നല്‍കി കേന്ദ്രം. വായ്പാ പരിധിയില്‍ നിന്നും മുന്‍കൂറായി കടമെടുക്കാനാണ് കേരളത്തിന് കേന്ദ്രം അനുമതി നല്‍കിയത്.സാമൂഹ്യസുരക്ഷ പെന്‍ഷന്‍ കമ്പനിക്ക് പണം കണ്ടെത്താന്‍ വീണ്ടും സഹകരണ കണ്‍സോര്‍ഷ്യം രൂപീകരിക്കാന്‍ സംസ്ഥാനം തീരുമാനിച്ചു.സംസ്ഥാനങ്ങള്‍ക്ക് ഈ വര്‍ഷം എടുക്കാവുന്ന വായ്പാ പരിധി കേന്ദ്രം നിശ്ചയിച്ച് നല്‍കുന്നത് അടുത്തമാസമാണ്. എന്നാല്‍ സാധാരണ ഏപ്രില്‍ മാസത്തെ ചെലവുകള്‍ക്കായി വായ്പാ പരിധിയ്ക്ക് അകത്ത് നിന്ന് ഒരു തുക മുന്‍കൂറായി കടം എടുക്കാന്‍ കേന്ദ്രം അനുമതി നല്‍കുകയും ചെയ്യും.

കഴിഞ്ഞ സാമ്പത്തിക വര്‍ഷം ഇത്തരത്തില്‍ 5000 കോടി രൂപ വായ്പയെടുക്കാന്‍ കേന്ദ്രം മുന്‍കൂര്‍ അനുമതി നല്‍കിയിരുന്നു . അതിനാല്‍ ഇത്തവണയും 5000 കോടി കടം എടുക്കാന്‍ അനുവദിക്കണമെന്ന് കേരളം ആവശ്യപ്പെട്ടു. പക്ഷേ 3000 കോടി കടം എടുക്കാനാണ് കേന്ദ്ര ധനമന്ത്രാലയം അനുമതി നല്‍കിയത്.സാമൂഹിക സുരക്ഷ പെന്‍ഷന്‍ കുടിശ്ശിക തീര്‍ക്കാനും കൂടുതല്‍ പണം കണ്ടെത്താന്‍ സംസ്ഥാനം നീക്കം തുടങ്ങി. പ്രാഥമിക സഹകരണ സംഘങ്ങളുടെ കണ്‍സോഷ്യം രൂപീകരിച്ച് പെന്‍ഷന്‍ കമ്പനിക്ക് പണം കണ്ടെത്താനാണ് നീക്കം . 9.1 ശതമാനം പലിശ നല്‍കും. 2000 കോടി രൂപ സമാഹരിക്കാനാണ് ലക്ഷ്യമിടുന്നത്. കഴിഞ്ഞ തവണ കണ്‍സോര്‍ഷ്യത്തിലൂടെ 800 കോടിയാണ് സമാഹരിച്ചത്.