ബെയ്ജിങ്: അന്തരീക്ഷ വായുവില്‍ നിന്ന് ഓക്‌സിജന്‍ വേര്‍തിരിച്ച് നല്‍കുന്ന 100 ഓക്‌സിജന്‍ കോണ്‍സെന്‍ട്രേറ്ററുകളും 40 വെന്റിലേറ്ററുകളും മറ്റു ഉപകരണങ്ങളും ഇന്ത്യയിലെത്തിച്ച് ചൈന.

ആദ്യഘട്ട സഹായമെന്ന നിലയിലാണ് ചൈനീസ് റെഡ്‌ക്രോസ് സൊസൈറ്റി ഇവ ഇന്ത്യക്ക് സംഭാവനയായി നല്‍കിയതെന്ന് ചൈനീസ് അംബാസഡര്‍ സണ്‍ വീഡോങ് ട്വിറ്ററിലൂടെ അറിയിച്ചു.

കൊവിഡിനെതിരായ പോരാട്ടത്തില്‍ ഇന്ത്യയെ സഹായിക്കുന്നതിനായി 10 ലക്ഷം ഡോളറിന്റെ സാമ്പത്തികസഹായവും ചൈനീസ് റെഡ്‌ക്രോസ് സൊസൈറ്റി ഇന്ത്യന്‍ റെഡ്‌ക്രോസ് സൊസൈറ്റിക്കു നല്‍കും.
ലോകത്ത് മനുഷ്യജീവനെക്കാള്‍ വിലപിടിച്ച ഒന്നുമില്ലെന്നും അദ്ദേഹം കൂട്ടിച്ചേര്‍ത്തു.

ഇന്ത്യക്കുവേണ്ടി 40,000 ഓക്‌സിജന്‍ ജനറേറ്ററുകള്‍ ചൈനീസ് കമ്പനികള്‍ അടിയന്തര പ്രാധാന്യത്തോടെ നിര്‍മിച്ചുവരുകയാണെന്ന് നേരത്തെ ചൈനീസ് അംബാസഡര്‍ അറിയിച്ചിരുന്നു.

ഏപ്രിലില്‍ ചൈന ഇന്ത്യക്ക് 5,000 വെന്റിലേറ്ററുകള്‍ നല്‍കിയിരുന്നു. തുടര്‍ന്നും ഇന്ത്യക്ക് സാധ്യമായ സഹായം നല്‍കും- അദ്ദേഹം പറഞ്ഞു.

ഏപ്രില്‍ മുതല്‍ ചൈന ഇന്ത്യക്ക് 21,569 ഓക്‌സിജന്‍ ജനറേറ്ററുകളും രണ്ടുകോടിയിലേറെ മാസ്‌കുകളും 3,800 ടണ്‍ മരുന്നുകളും നല്‍കിയതായി സണ്‍ ചൂണ്ടിക്കാട്ടി.