മംഗളൂരു: കര്‍ണാടകയില്‍ പാക്കറ്റ് ഇളനീര്‍ വെള്ളം കുടിച്ച് 15 പേര്‍ ആശുപത്രിയില്‍. സ്ത്രീകളും കുട്ടികളുമുള്‍പ്പടെയുള്ളവര്‍ക്ക് ഛര്‍ദിയും വയറിളക്കവും അനുഭവപ്പെട്ടതിനെ തുടര്‍ന്നാണ് ആശുപത്രിയില്‍ പ്രവേശിപ്പിച്ചത്. പ്രാദേശിക ക്ലിനിക്കുകളില്‍ പ്രവേശിപ്പിച്ച ഇവരെ ആരോഗ്യസ്ഥിതി മോശമായതിനെത്തുടര്‍ന്ന് മറ്റ് ആശുപത്രികളിലേക്ക് മാറ്റി.

ലിറ്ററിന് 40 രൂപ നിരക്കില്‍ അഡയാറിലെ ഫാക്ടറിയില്‍ നിന്നാണ് ഇവര്‍ ഇളനീര്‍വെള്ളം വാങ്ങിയത്.  വേനല്‍ക്കാലമായതിനാല്‍ കൂള്‍ഡ്രിങ്ക്സ് വില്‍പ്പന തകൃതിയായി നടക്കുകയാണ്. ഇളനീര്‍ വെള്ളമാകുമ്പോള്‍ മറ്റ് പ്രശ്നങ്ങളൊന്നുമുണ്ടാകില്ലെന്ന വിശ്വാസമാണ് കൂടുതല്‍ പേരും ഇത് വാങ്ങിക്കുടിക്കുന്നതെന്ന് ഉദ്യോഗസ്ഥര്‍ പറയുന്നു.
 
പരാതിയെതുടര്‍ന്ന് ആരോഗ്യവകുപ്പ് ഉദ്യോഗസ്ഥര്‍ ഇളനീര്‍വെള്ളത്തിന്റെ സാമ്പിളുകള്‍ ശേഖരിച്ച് പരിശോധനയ്ക്ക് അയക്കുകയും ഫാക്ടറി പൂട്ടുവാന്‍ നിര്‍ദേശം നല്‍കുകയും ചെയ്തിട്ടുണ്ട്. രണ്ട് സ്ത്രീകളും ഒരു കുട്ടിയുമുള്‍പ്പെടെ മൂന്ന് പേര്‍ സ്വകാര്യ ആശുപത്രിയില്‍ നിരീക്ഷണത്തില്‍ തുടരുകയാണ്. ബാക്കിയുള്ളവരുടെ ആരോഗ്യനിലയില്‍ പുരോഗതിയുണ്ടെന്ന് ആരോഗ്യവകുപ്പ് ഉദ്യോഗസ്ഥര്‍ അറിയിച്ചു.