കോഴിക്കോട്: കരിപ്പൂരില്‍ വന്‍ സ്വര്‍ണ വേട്ട. 7.314 കിലോ ഗ്രാം സ്വര്‍ണ മിശ്രിതമാണ് എയര്‍പോര്‍ട്ട് കസ്റ്റംസ് പിടികൂടിയത്. സംഭവത്തില്‍ പെരിന്തല്‍മണ്ണ സ്വദേശികളും ദമ്പതികളുമായ അബ്ദുസമദ്, സഫ്‌ന അബ്ദുസമദ് എന്നിവര്‍ പിടിയിലായി.

അബ്ദുസമദ് കടത്തിയത് 3672 ഗ്രാം സ്വര്‍ണവും ഭാര്യ സഫ്‌ന 3642 ഗ്രാം സ്വര്‍ണവുമാണ് കൊണ്ടുവന്നത്. ശരീരത്തിനുള്ളിലും അടിവസ്ത്രത്തിലും സോക്‌സിലും ഒളിപ്പിച്ചാണ് ഇരുവരും സ്വര്‍ണം കടത്തിയത്.

മൂന്ന് കോടിരൂപയിലധികം മൂല്യമാണ് ഈ സ്വര്‍ണത്തിന് കണക്കാക്കുന്നത്. ഇരുവരും റിമാന്റിലാണ്. ആര്‍ക്ക് വേണ്ടിയാണ് സ്വര്‍ണം കടത്തിയതെന്നതുള്‍പ്പെടെ അന്വേഷിച്ച് വരികയാണെന്ന് കസ്റ്റംസ് അറിയിച്ചു.

ഇന്നലെയും കരിപ്പൂരില്‍ സ്വര്‍ണം കടത്താന്‍ ശ്രമം നടന്നിരുന്നു. ആറ് കിലോ സ്വര്‍ണവുമായി ആറ് യാത്രികരാണ് ഇന്നലെ കരിപ്പൂരില്‍ പിടിയിലായത്.