കൊല്ലം: കൊല്ലം ചിതറയില്‍ ഭര്‍ത്താവിന് വാട്‌സ്ആപ്പിലൂടെ ആത്മഹത്യാശ്രമത്തിന്റെ ചിത്രങ്ങളും ശബ്ദസന്ദേശവും  അയച്ചുകൊടുത്ത് യുവതി ജീവനൊടുക്കി. ചിതറ കുമ്മിള്‍ മുള്ളാണിപ്പച്ച സ്വദേശിനി ശ്രീവിദ്യയാണ്(24) തൂങ്ങിമരിച്ചത്. കുടുംബപ്രശ്‌നങ്ങളാണ് ആത്മഹത്യക്ക് കാരണമെന്നാണ് പൊലീസിന്റെ നിഗമനം. മൂന്ന് വര്‍ഷം മുമ്പായിരുന്നു ചിതറ കാരിച്ചിറ സ്വദേശി ജിതിനുമായുള്ള ഇവരുടെ വിവാഹം. തെറ്റിമുക്കിന് സമീപമുള്ള വാടക വീടിനുള്ളിലാണ് തൂങ്ങിമരിച്ച നിലയില്‍ ശ്രീവിദ്യയെ കണ്ടെത്തിയത്. 

മരിക്കാന്‍ പോവുകയാണെന്ന് അറിയിച്ച് ശ്രീവിദ്യ ജിതിന് വാട്‌സ്ആപ്പ് സന്ദേശം അയച്ചിരുന്നു. തുടര്‍ന്ന് ആത്മഹത്യാശ്രമത്തിന്റെ ചിത്രങ്ങളും അയച്ചു. ഇത് കണ്ട ജിതിന്‍  ഫോണില്‍ വിളിച്ചിട്ട് ശ്രീവിദ്യ ഫോണ്‍ എടുത്തില്ല. വീട്ടിലെത്തിയപ്പോഴേക്കും ശ്രീവിദ്യ ആത്മഹത്യക്ക് ശ്രമിച്ചിരുന്നു. ഉടന്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. ഭര്‍ത്താവ് നിരന്തരം ഉപദ്രവിച്ചിരുന്നെന്നാണ് ബന്ധുക്കളുടെ പരാതി. ഇവര്‍ക്ക് രണ്ടുവയസ്സുള്ള കുട്ടിയുണ്ട്. ശ്രീവിദ്യയുടെയും ജിതിന്റെയും മെബൈല്‍ ഫോണ്‍ പൊലീസ് കസ്റ്റഡിയിലെടുത്തിട്ടുണ്ട്. ശ്രീവിദ്യ നേരത്തെയും ആത്മഹത്യാശ്രമം നടത്തിയിട്ടുണ്ടെന്നാണ് ജിതിന്‍ പൊലീസിന് നല്‍കിയ മൊഴി. ബന്ധുക്കളുടെ കൂടെമൊഴി രേഖപ്പെടുത്തി അന്വേഷണം നടത്തുമെന്ന് പൊലീസ് അറിയിച്ചു.