ബെയ്ജിങ്: ചൊവ്വയില്‍ വിജയകരമായി റോവര്‍ ഇറക്കി ചൈന. ശനിയാഴ്ച പുലര്‍ച്ചെയോടെയാണ് സുറോങ് റോവര്‍ സുരക്ഷിതമായി ചൊവ്വയില്‍ ഇറങ്ങിയത്. ഇതോടെ അമേരിക്കയ്ക്ക് പിന്നാലെ, ചൊവ്വയില്‍ റോവര്‍ ഇറക്കുന്ന രണ്ടാമത്തെ രാജ്യമായി ചൈന.

ആദ്യ ദൗത്യത്തില്‍ തന്നെ ചൊവ്വയില്‍ സോഫ്റ്റ് ലാന്‍ഡിങ് നടത്തുന്ന ആദ്യ രാജ്യം എന്ന നേട്ടവും ഇതോടെ ചൈന സ്വന്തമാക്കി. സോളാറില്‍ പ്രവര്‍ത്തിക്കുന്ന സുറോങ് റോവറിന് 240 കിലോഗ്രാമാണ് ഭാരം.

കഴിഞ്ഞ വര്‍ഷം ജൂലൈ 23 നാണ് വെന്‍ചാങ് സ്‌പേസ് ലോഞ്ച് സെന്ററില്‍ നിന്നും ടിയാന്‍വെന്‍ 1 ഓര്‍ബിറ്റര്‍ ലോഞ്ച് ചെയ്തത്. ഏഴുമാസത്തിനു ശേഷം ഫെബ്രുവരിയില്‍ ചൊവ്വയുടെ ഭ്രമണപഥത്തിലെത്തി.

തുടര്‍ന്ന് മൂന്ന് മാസത്തോളം ചൊവ്വയെ വലംവെച്ച ശേഷമാണ് ചൊവ്വയിലെ ഉട്ടോപ്യ മേഖലയില്‍ സുറോങ് റോവര്‍ ഇറങ്ങിയത്.

ലാന്‍ഡിങ്ങിനു മുമ്പുള്ള ഏഴു മിനിറ്റായിരുന്നു നിര്‍ണായകം. പേടകവുമായുള്ള വിനിമയബന്ധം നിലച്ചു പോയേക്കുമെന്ന ആശങ്ക മറികടന്ന് പാരച്യൂട്ടിലാണ് സുറോങ് ചൊവ്വയില്‍ ഇറങ്ങിയത്.