കൊല്ലം: കൊല്ലം കുണ്ടറ വെള്ളിമണ്ണില്‍ കിണറിടിഞ്ഞ് ഒരു മരണം. എഴുകോണ്‍ ഇരമ്പനങ്ങാട് സ്വദേശി ഗിരീഷ് കുമാറാണ് മണ്ണിനടിയില്‍പ്പെട്ട് മരിച്ചത്.

കിണര്‍ വൃത്തിയാക്കി ഗിരീഷ് കുമാര്‍ മുകളിലേക്ക് കയറുന്നതിനിടെയാണ് മണ്ണിടിച്ചിലുണ്ടായത്. ഉടന്‍ തന്നെ നാട്ടുകാരുടെ സഹായത്തോടെ മുപ്പതടിയോളം ആഴമുള്ള കിണറ്റില്‍ ഫയര്‍ഫോഴ്‌സ് രക്ഷാപ്രവര്‍ത്തനം ആരംഭിച്ചെങ്കിലും ഗിരീഷിനെ പുറത്തെത്തിക്കാനായില്ല.

തുടര്‍ന്ന് ജെ.സി.ബി ഉപയോഗിച്ച് മറ്റൊരു കുഴിയെടുത്തുകൊണ്ടാണ് രക്ഷാപ്രവര്‍ത്തനം നടത്തിയത്. എന്നാല്‍ പ്രദേശത്തെ മണ്ണിന്റെ സ്വഭാവം വളരെ മോശമായത് രക്ഷാപ്രവര്‍ത്തനത്തെ പ്രതികൂലമായി ബാധിച്ചു.