ന്യൂഡല്‍ഹി: മണിപ്പൂരില്‍ രണ്ടു സായുധവിഭാഗങ്ങള്‍ തമ്മിലുണ്ടായ സംഘര്‍ഷത്തില്‍ രണ്ടു പേര്‍ കൊല്ലപ്പെട്ടു. ഇംഫാല്‍ ഈസ്റ്റില്‍ കാങ്‌പോക്പിക്കു സമീപമാണ് സംഭവം. വെടിവെപ്പില്‍ കൊല്ലപ്പെട്ടവരെ തിരിച്ചറിഞ്ഞിട്ടില്ല.

സ്ഥിതി നിയന്ത്രണവിധേയമാക്കാന്‍ കൂടുതല്‍ പൊലിസിനെയും കേന്ദ്ര സേനകളെയും നിയമിച്ചിട്ടുണ്ട്. അടുത്തിടെ തെങ്‌നൂപാലില്‍ രണ്ടു വിഭാഗങ്ങള്‍ക്കിടയിലെ വെടിവെപ്പില്‍ മൂന്നു പേര്‍ക്ക് പരിക്കേറ്റിരുന്നു.

തെരഞ്ഞെടുപ്പിന് 6 ദിവസം മാത്രം ശേഷിക്കെയാണ് പുതിയ സംഭവം. ഇത് മേഖലയിലെ സ്ഥിരതയെയും സുരക്ഷയെയും കുറിച്ചുള്ള ആശങ്കകള്‍ വര്‍ധിപ്പിക്കുകയാണ്. മണിപ്പൂരില്‍ ഏപ്രില്‍ 19 നും 26 നും രണ്ട് ഘട്ടങ്ങളിലായാണ് പൊതുതെരഞ്ഞെടുപ്പ് നടക്കുന്നത്.

കഴിഞ്ഞ വര്‍ഷം മണിപ്പൂരിനെ ചോരക്കളമാക്കിയ സംഘര്‍ഷങ്ങളില്‍ ഔദ്യോഗിക കണക്കുകള്‍ പ്രകാരം 219 പേര്‍ കൊല്ലപ്പെട്ടിട്ടുണ്ട്. പകുതിയിലേറെ ജനസംഖ്യയുള്ള മെയ്‌തെയ്കള്‍ ഒരുവശത്തും 40 ശതമാനത്തിലേറെയുള്ള നാഗകള്‍, കുക്കികള്‍ എന്നിവര്‍ മറുവശത്തുമായാണ് സംഘര്‍ഷം.