ന്യുഡല്‍ഹി: പാര്‍ലമെന്റ് സമ്മേളനത്തിന്റെ നാലാംദിനവും ഭരണപക്ഷ പ്രതിപക്ഷ ബഹളത്തെ തുടര്‍ന്ന് സഭ തടസ്സപ്പെട്ടു. വിദേശത്തുനടത്തിയ പരമാര്‍ശങ്ങളുടെ പേരില്‍ രാഹുല്‍ ഗാന്ധി മാപ്പ് പറയണമെന്നായിരുന്നു ഭരണപക്ഷം ഇരു സഭകളിലും ആവശ്യപ്പെട്ടത്. വിദേശ സന്ദര്‍ശനത്തിന് ശേഷം ഇന്നലെയാണ് രാഹുല്‍ ഗാന്ധി ഇന്ത്യയില്‍ എത്തിയത്. വിദേശത്ത് രാഹുല്‍ നടത്തിയ പരാമര്‍ശങ്ങള്‍ ഇന്ത്യാ വിരുദ്ധം എന്നതാണ് ബി.ജെ.പിയുടെ ആരോപണം. ഇതില്‍ രാഹുല്‍ മാപ്പ് പറയണമെന്നാണ് തുടര്‍ച്ചയായി സഭയില്‍ ആവശ്യപ്പെടുന്നത്.

എന്നാല്‍ ഒന്നും രാജ്യവിരുദ്ധമായി പറഞ്ഞിട്ടില്ലെന്ന് രാഹുല്‍ ഗാന്ധി പറഞ്ഞു. അനുവദിക്കുകയാണെങ്കില്‍ പാര്‍ലമെന്റിന് അകത്ത് സംസാരിക്കുമെന്നും രാഹുല്‍ വ്യക്തമാക്കി. രാഹുലിന്റെ പരാമര്‍ശങ്ങള്‍ ഉയര്‍ത്തി ബി.ജെ.പിയും അദാനി വിഷയം ഉയര്‍ത്തി പ്രതിപക്ഷവും ലോക്‌സഭയിലും രാജ്യസഭയിലും ബഹളം വെക്കുകയായിരുന്നു.

തുടര്‍ന്ന് ഇരു സഭകളും രണ്ട് മണി വരെ നിര്‍ത്തിവെച്ചു. രാജ്യസഭയില്‍ തൃണമൂല്‍ കോണ്‍ഗ്രസ് നേതാവ് ഡെറിക് ഒബ്രിയാന്‍ ഉള്‍പ്പെടെയുള്ളവര്‍ വാ മൂടിക്കെട്ടി പ്രതിഷേധിച്ചു. പാര്‍ലമെന്റ് ചേരുന്നതിന് മുന്‍പ് പ്രധാനമന്ത്രി നരേന്ദ്രമോദി മന്ത്രിമാരുമായി ചര്‍ച്ച നടത്തിയിരുന്നു. കോണ്‍ഗ്രസിന്റെ നേതൃത്വത്തില്‍ പ്രതിപക്ഷ പാര്‍ട്ടികളും പാര്‍ലമെന്റില്‍ യോഗം ചേര്‍ന്നിരുന്നു.

എന്നാല്‍ ഇതിന് പിന്നാലെ പ്രതിപക്ഷ എംപിമാര്‍ പാര്‍ലമെന്റിന് പുറത്ത് പ്രതിഷേധിച്ചു. പാര്‍ലമെന്റിന് പുറത്ത് മനുഷ്യ ചങ്ങല തീര്‍ത്താണ് പ്രതിപക്ഷ എംപിമാര്‍ പ്രതിഷേധിച്ചത്.