കല്‍പ്പറ്റ: എറണാകുളം മുന്‍ കലക്ടര്‍ രേണു രാജ് വയനാട് ജില്ലാ കളക്ടറായി ചുമതലയേറ്റു. ബ്രഹ്മപുരം വിവാദങ്ങള്‍ക്കിടെയാണ് എറണാകുളത്ത് നിന്ന് രേണു രാജിനെ വയനാട്ടിലേക്ക് സ്ഥലം മാറ്റിയത്. സ്ഥലംമാറ്റ ഉത്തരവു വന്നതിനുപിന്നാലെ 'പ്രതിഷേധ സ്വര'ത്തോടെയുള്ള പോസ്റ്റുമായി രേണുരാജ് രംഗത്തെത്തിയിരുന്നു.
''നീ പെണ്ണാണ് എന്നു കേള്‍ക്കുന്നത് അഭിമാനമാണ്. നീ വെറും പെണ്ണാണ് എന്നു പറയുന്നിടത്താണ് പ്രതിഷേധം'' എന്ന വരികളാണ് വനിതാ ദിനാശംസയായി കലക്ടര്‍ വൈകിട്ട് ഏഴരയോടെ ഫെയ്‌സ്ബുക്കില്‍ പോസ്റ്റ് ചെയ്തത്.

അപ്രതീക്ഷിത സ്ഥലംമാറ്റത്തിലുള്ള പ്രതിഷേധമാണ് വനിതാദിന പോസ്റ്റിലൂടെ രേണുരാജ് വ്യക്തമാക്കിയത് എന്നാണ് വിലയിരുത്തപ്പെട്ടിരുന്നത്. ഏഴു മാസവും 12 ദിവസവും ജില്ലയെ നയിച്ച രേണു രാജിന് വനിതാ ദിനമായ ബുധനാഴ്ചയാണ് അപ്രതീക്ഷിത സ്ഥലംമാറ്റം ലഭിച്ചത്.
രേണു രാജ് പുതിയ കലക്ടര്‍ക്ക് ചുമതല കൈമാറുന്ന ചടങ്ങിന് എത്തിയിരുന്നില്ല. യാത്രയയപ്പിനും നിന്നില്ല. എന്‍.എസ്.കെ ഉമേഷിന് ചുമതല കൈമാറാന്‍ എത്തുമെന്ന് അറിയിച്ചെങ്കിലും അവസാന നിമിഷം പിന്മാറുകയായിരുന്നു.
അതേ സമയം സ്ഥലം മാറ്റം സര്‍ക്കാര്‍ ഉദ്യോഗസ്ഥരെ സംബന്ധിച്ച് സ്വാഭാവികം മാത്രമായ കാര്യമാണെന്ന് രേണു രാജ് പ്രതികരിച്ചു.

ബ്രഹ്മപുരം വിഷയത്തില്‍ ജില്ലാ കലക്ടറെന്നെ നിലയില്‍ ചെയ്യാവുന്നതെല്ലാം ചെയ്തിട്ടുണ്ട്. നിറഞ്ഞ സന്തോഷത്തോടെയാണ് വയനാടിന്റെ കലക്ടറായി ചുമതലയേല്‍ക്കുന്നതെന്നും അവര്‍ കൂട്ടിച്ചേര്‍ത്തു.
ബ്രഹ്മപുരത്തെ തീപിടിത്തത്തിലെ അട്ടിമറി സാധ്യത തള്ളിയിരുന്നു ജില്ലാ കലക്ടറായിരുന്ന രേണു രാജ്. അതേ സമയം മാലിന്യത്തിന്റെ രാസ വിഘടന പ്രക്രിയയാണ് തീപിടിത്തത്തിന് കാരണം എന്നാണ് മുഖ്യമന്ത്രി
വിളിച്ച യോഗത്തില്‍ രേണുരാജ് വിശദീകരിച്ചത്. ഇത് കാരണം ബഹിര്‍ഗമിക്കുന്ന ചൂട് കാരണമുണ്ടാക്കുന്ന സ്‌മോള്‍ഡറിംഗാണ് പ്ലാന്റില്‍ ഉണ്ടായത്. പൊതുവെ ചൂട് വര്‍ധിച്ചതും ആക്കം കൂട്ടിയെന്ന് രേണു രാജ് കൂട്ടിച്ചേര്‍ത്തു.മുഖ്യമന്ത്രി പിണറായി വിജയന്‍ വിളിച്ച യോഗത്തിലായിരുന്നു കലക്ടറുടെ വിശദീകരണം. പിന്നാലെ സ്ഥലംമാറ്റ ഉത്തരവും വന്നു. യോഗം തീര്‍ന്ന് കലക്ടര്‍ ഓഫിസില്‍ തിരിച്ചെത്തും മുമ്പേ സര്‍ക്കാര്‍ ഉത്തരവും എത്തി.

ഐ.എ.എസ് തലപ്പത്ത് തന്നെഅഴിച്ചു പണി നടത്തിയിരിക്കുകയാണ്. വിവിധ ജില്ലകളിലെ കലക്ടര്‍മാരെ സ്ഥലംമാറ്റിയ കൂട്ടത്തിലാണ് എറണാകുളം കലക്ടര്‍ രേണുരാജിനെ വയനാട്ടിലേക്ക് മാറ്റിയത്.
മാര്‍ച്ച് രണ്ടിന് വൈകുന്നേരം 4.30 നാണ് ബ്രഹ്മപുരം മാലിന്യ പ്ലാന്റില്‍ തീപിടുത്തം റിപ്പോര്‍ട്ട് ചെയ്യപ്പെട്ടത്. ഉടന്‍ തന്നെ ഫയര്‍ ഫോഴ്‌സ്, പൊലിസ് യൂണിറ്റുകള്‍ സ്ഥലത്തെത്തി തീയണയ്ക്കാനുള്ള ശ്രമങ്ങള്‍ ആരംഭിച്ചുവെന്നും പുറമെ നേവി, വായു സേനയുള്‍പ്പെടെയുള്ള കേന്ദ്ര ഏജന്‍സികളുടെയും സഹായം ലഭ്യമാക്കിയെന്നും രേണു രാജ് യോഗത്തില്‍ വിശദീകരിച്ചു.