കോഴിക്കോട്
സംസ്ഥാന വഖ്ഫ് ബോർഡിൽ ഇതര സമുദായ അംഗത്തെ നിയമിച്ചതിനെതിരേ വ്യാപക പ്രതിഷേധം.
പള്ളി, മദ്റസ തുടങ്ങിയ വഖ്ഫ് സ്വത്തുക്കളുടെ നടത്തിപ്പുമായി ബന്ധപ്പെട്ട വഖ്ഫ് ബോർഡിൽ മുസ്‌ലിം സമുദായത്തിൽ നിന്ന് മാത്രമായിരുന്നു നിയമനം നടന്നിരുന്നത്. ഇത് അട്ടിമറിച്ച് പുതിയ സി.ഇ.ഒ വി.എസ് സക്കീർ ഹുസൈന്റെ ഡ്രൈവർ കം പഴ്‌സനൽ അറ്റൻഡർ ആയി ഇതര സമുദായ അംഗത്തെ നിയമിച്ച നടപടിയാണ് എതിർപ്പിന് കാരണമായത്. വഖ്ഫ് ബോർഡ് നിയമനങ്ങൾ പി.എസ്.സിക്ക് വിട്ടതുമായി ബന്ധപ്പെട്ട പ്രതിഷേധങ്ങൾക്കിടെയാണ് ഈ നടപടി.

പി.എസ്.സിക്ക് വിട്ട നടപടി പുനഃപരിശോധിക്കുമെന്ന് മുഖ്യമന്ത്രി മതനേതാക്കൾക്ക് രണ്ടാമതും ഉറപ്പുനൽകിയതിന് പിന്നാലെ നടന്ന നിയമനം പ്രതിഷേധാർഹമാണെന്ന് മുസ് ലിം സംഘടനകൾ ചൂണ്ടിക്കാട്ടുന്നു. താൽക്കാലിക നിയമനമാണെങ്കിൽ കൂടി ഇത് വഖ്ഫ് ബോർഡിലെ ഇതര സമുദായ നിയമനത്തിന്റെ തുടക്കമാണെന്നും മുസ്‌ലിം സമുദായത്തിന് മാത്രം അവകാശപ്പെട്ട നിയമനങ്ങൾ അട്ടിമറിക്കാനുള്ള നീക്കത്തിന്റെ ഭാഗമാണിതെന്നും വിമർശനം ഉയർന്നിട്ടുണ്ട്. മുൻ സി.ഇ.ഒയുടെ അറ്റൻഡറായ മുസ്‌ലിം സമുദായാംഗത്തെ പിരിച്ചുവിട്ടാണ് തൃശൂർ സ്വദേശിയായ എൽതുരുത്ത് ആലപ്പാട്ട് എ.പി സാൽമോനെ നിയമിക്കാൻ ബോർഡ് ചെയർമാൻ ടി.കെ ഹംസ അനുമതി നൽകിയത്.
2016 ജനുവരിയിൽ യു.ഡി.എഫ് സർക്കാർ ഇറക്കിയ ഉത്തരവ് പ്രകാരം പ്രസിദ്ധീകരിച്ച വഖ്ഫ് ബോർഡ് റഗുലേഷനിൽ സമുദായത്തിൽ നിന്ന് മാത്രമേ വഖ്ഫ് ബോർഡിൽ നിയമനം നടത്താവൂ എന്ന് നിർദേശിച്ചിരുന്നു. എന്നാൽ, 2020 ഏപ്രിലിൽ നിയമനങ്ങൾ പി.എസ്.സിക്ക് വിട്ട് പ്രസിദ്ധീകരിച്ച ഉത്തരവ് പ്രകാരമുള്ള ചട്ടത്തിലെ ഭേദഗതിയിൽ നിന്ന് മുസ്‌ലിം സമുദായത്തിൽ നിന്ന് മാത്രമേ നിയമനം നടത്താവൂ എന്ന വ്യവസ്ഥ നീക്കി. കഴിഞ്ഞമാസം 25ന് ചേർന്ന ബോർഡ് യോഗത്തിൽ അംഗങ്ങളായ എം.സി മായിൻഹാജി, പി.ഉബൈദുല്ല എം.എൽ.എ, അഡ്വ. പി.വി സൈനുദ്ദീൻ എന്നിവർ ഈ വിഷയം ചെയർമാന്റെ ശ്രദ്ധയിൽപെടുത്തിയെങ്കിലും നിഷേധാത്മക നിലപാടാണ് സ്വീകരിച്ചതെന്നും വിമർശനം ഉയരുന്നുണ്ട്.

മറ്റ് സംസ്ഥാനങ്ങളിലെ വഖ്ഫ് ബോർഡുകളിലെല്ലാം മുസ് ലികളെ മാത്രം നിയമിക്കുമ്പോൾ കേരളത്തിൽ ഈ വ്യവസ്ഥ അട്ടിമറിക്കുന്നത് അംഗീകരിക്കാനാവില്ലെന്ന് സംഘടനാ നേതാക്കൾ ചൂണ്ടിക്കാട്ടുന്നു. ദേവസ്വം ബോർഡിലേക്ക് ഹിന്ദുക്കളല്ലാത്തവരെ നിയമിക്കാറില്ലെന്നിരിക്കെയാണ് വഖ്ഫ് ബോർഡിലെ നിയമനം.

അതേസമയം, താൽക്കാലികമായി ദിവസ വേതനാടിസ്ഥാനത്തിലാണ് നിയമനമെന്നു സി.ഇ.ഒ സക്കീർ ഹുസൈൻ പറഞ്ഞു. നിയമനം പി.എസ്.സിക്കു വിട്ടതും മറ്റു വിഷയങ്ങളും സ്ഥിര നിയമനവുമായി ബന്ധപ്പെട്ടാണ്. താൽക്കാലിക നിയമനത്തിൽ ഇത് ബാധകമാവില്ല. ഇപ്പോൾ നടത്തിയത് ദിവസ വേതന അടിസ്ഥാനത്തിലുള്ള താൽക്കാലിക നിയമനം മാത്രമാണെന്നും സക്കീർ ഹുസൈൻ പറഞ്ഞു.
വഖ്ഫ് ബോർഡ് 2008 ൽ തിരുവനന്തപുരം ഡിവിഷണൽ ഓഫിസിൽ വത്സല എന്ന വ്യക്തിയെ സ്വീപർ കം അറ്റൻഡർ തസ്തികയിലും 2006 ൽ ആന്റണി വർഗീസ് എന്നയാളെ കൊച്ചി ആസ്ഥാനത്ത്‌ വാച്ച്മാൻ തസ്തികയിലും കുടുംബശ്രീയിൽ നിന്നല്ലാതെ തന്നെ നിയമിച്ചിട്ടുണ്ടെന്നും കോഴിക്കോട് ഓഫിസിൽ റീന വിൻസെന്റ് എന്ന വ്യക്തിയെ സ്വീപർ തസ്തികയിലും നിയമിച്ചിട്ടുണ്ടെന്നുമാണ് വഖ്ഫ് മന്ത്രിയുടെ ഓഫീസ് നൽകുന്ന വിശദീകരണം.