കൊച്ചി: സംസ്ഥാനത്തേക്കുള്ള ആദ്യ ഓക്‌സിജന്‍ എക്‌സ്പ്രസ് ഇന്നലെ പുലര്‍ച്ചയോടെ കൊച്ചിയിലെത്തി. ഡല്‍ഹിയില്‍നിന്ന് വല്ലാര്‍പാടം കണ്ടെയ്‌നര്‍ ടെര്‍മിനലിലെത്തിച്ച ഓക്‌സിജന്‍ എക്‌സ്പ്രസില്‍ കൊണ്ടുവന്നത് 118 മെട്രിക് ടണ്‍ ജീവവായു.

 

20 മെട്രിക് ടണ്‍ വീതം ശേഷിയുള്ള ആറു വിദേശനിര്‍മിത കണ്ടെയ്‌നറുകളിലാണ് ഇവ കൊച്ചിയിലെത്തിച്ചത്. തിരുവനന്തപുരത്തെ കൊവിഡ് വാര്‍ റൂമില്‍ നിന്നുള്ള നിര്‍ദേശപ്രകാരം ഈ ഓക്‌സിജന്‍ ആവശ്യമുള്ള ജില്ലകളിലേക്ക് റോഡുമാര്‍ഗം കൊണ്ടുപോകും. ഇതിനായി ഓക്‌സിജന്‍ ടാങ്കര്‍ ലോറികളില്‍ നിറച്ചു. ഇതിന് അഗ്നിരക്ഷാസേനയും മറ്റും സുരക്ഷ ഒരുക്കിയിരുന്നു.ഞായറാഴ്ച പുലര്‍ച്ചെ രണ്ടുണിയോടെയാണ് ഓക്‌സിജന്‍ എക്‌സ്പ്രസ് വല്ലാര്‍പാടം കണ്ടെയ്‌നര്‍ ടെര്‍മിനലിലെത്തിയത്. ഒഡിഷയിലെ കലിംഗനഗര്‍ ടാറ്റാ സ്റ്റീല്‍ പ്ലാന്റില്‍ നിന്നാണ് കണ്ടെയ്നറുകളില്‍ ഓക്‌സിജന്‍ നിറച്ചത്. ഡല്‍ഹിയിലെ ഓക്‌സിജന്‍ ക്ഷാമം പരിഹരിക്കാന്‍ ഇവ ആദ്യം രാജ്യതലസ്ഥാനത്താണ് എത്തിച്ചത്. എന്നാല്‍ ഡല്‍ഹിയില്‍ ആവശ്യം കുറവാണെന്ന് കേന്ദ്ര സര്‍ക്കാരിന്റെ എംപവേര്‍ഡ് ഗ്രൂപ്പ് കണ്ടെത്തിയതിനെ തുടര്‍ന്ന് ഓക്‌സിജന്‍ ടാങ്കറുകള്‍ കേരളത്തിലേക്കയയ്ക്കാന്‍ നിര്‍ദേശിക്കുകയായിരുന്നു. കൊവിഡ് രോഗികളുടെ എണ്ണം വര്‍ധിച്ചുവരുന്ന സാഹചര്യത്തില്‍ കേരളത്തിനു കൂടുതല്‍ ഓക്‌സിജന്‍ അനുവദിക്കണമെന്ന് സംസ്ഥാന സര്‍ക്കാര്‍ കേന്ദ്ര സര്‍ക്കാരിനോട് ആവശ്യപ്പെടുകയും ചെയ്തിരുന്നു.

 

ആദ്യ ഓക്‌സിജന്‍ എക്‌സ്പ്രസ് കാര്യമായ തടസ്സങ്ങളില്ലാതെ കേരളത്തിലെത്തിക്കാന്‍ കഴിഞ്ഞ സാഹചര്യത്തില്‍ സംസ്ഥാനത്തിന്റെ ആവശ്യമനുസരിച്ച് കൂടുതല്‍ ഓക്‌സിജന്‍ എക്‌സ്പ്രസ് എത്തിക്കാന്‍ സന്നദ്ധമാണെന്ന് റെയില്‍വേ വൃത്തങ്ങള്‍ വ്യക്തമാക്കി.കൊല്‍ക്കത്തയില്‍നിന്നുള്ള ഓക്‌സിജനും ഉടന്‍ സംസ്ഥാനത്തെത്തും. ഇതിനായി മൂന്നു ടാങ്കറുകളാണ് കഴിഞ്ഞദിവസം ചരക്കുവിമാനത്തില്‍ കൊച്ചിയില്‍നിന്ന് കൊല്‍ക്കത്തയിലേക്കയച്ചത്. ഒമ്പത് ടണ്‍ ഓക്‌സിജന്‍ നിറയ്ക്കാവുന്ന ഈ ടാങ്കറുകള്‍ കൊല്‍ക്കത്തയില്‍നിന്ന് റോഡ് മാര്‍ഗമാണ് കേരളത്തിലേക്കെത്തിക്കുക.