ദുബൈ: അറ്റകുറ്റപ്പണികള്‍ക്കായി ദുബൈ അന്താരാഷ്ട്ര വിമാനത്താവളത്തിലെ ഒരു റണ്‍വെ അടച്ചിടുന്നു. ഇതിന്റെ മുന്നൊരുക്കങ്ങള്‍ ആരംഭിച്ചു. തിങ്കളാഴ്ച മുതലാണ് വടക്കു ഭാഗത്തെ റണ്‍വെ അടച്ചിടുക.ബദല്‍ സംവിധാനങ്ങള്‍ കുറ്റമറ്റ രീതിയില്‍ ഒരുക്കിയതായി എയര്‍പോര്‍ട്ട് അധികൃതര്‍ വ്യക്തമാക്കി. റണ്‍വേ നവീകരണത്തിന്റെ ഭാഗമായി ഇന്ത്യയുള്‍പ്പെടെ പല രാജ്യങ്ങളിലേക്കുള്ള വിമാനങ്ങളും വഴിതിരിച്ചു വിടും.

റണ്‍വേ അടക്കുന്ന പശ്ചാത്തലത്തില്‍ 1000 വിമാനങ്ങള്‍ ജബല്‍ അലിയിലെ മക്തും വിമാനത്താവളത്തിലേക്ക് തിരിച്ചുവിടാനാണ് അധികൃതര്‍ തീരുമാനിച്ചിരിക്കുന്നത്. മെയ് ഒമ്പത് മുതല്‍ ജൂണ്‍ 22 വരെ 45 ദിവസത്തേക്കാണ് ദുബൈ അന്താരാഷ്ട്ര വിമാനത്താവളത്തിന്റെ റണ്‍വേയുടെ ഒരുഭാഗം അടക്കുക. ലോകത്തിലെതന്നെ ഏറ്റവും തിരക്കേറിയ വിമാനത്താവളമാണ് ദുബൈ എയര്‍പോര്‍ട്ട്. സുരക്ഷയും കാര്യക്ഷമതയും ഉറപ്പാക്കുന്നതിന് വേണ്ടിയാണ് റണ്‍വേയുടെ അറ്റകുറ്റപ്പണികള്‍ നടത്തുന്നതെന്ന് ദുബൈ എയര്‍പോര്‍ട്ട്സ് സി.ഇ.ഒ പോള്‍ ഗ്രിഫിത്ത്സ് നേരത്തെ വ്യക്തമാക്കിയിരുന്നു.

യാത്രക്കാര്‍ക്ക് ബുദ്ധിമുട്ടുണ്ടാവാതിരിക്കാനാണ് സര്‍വീസുകള്‍ ദുബൈ വേള്‍ഡ് സെന്‍ട്രലിലേക്ക് മാറ്റുന്നത്. യാത്രക്കാര്‍ തങ്ങള്‍ എത്തിച്ചേരുന്നത് ഏത് വിമാനത്താവളത്തിലേക്കാണെന്നും പുറപ്പെടുന്നത് എവിടെ നിന്നാണെന്നും വിമാനക്കമ്പനികളില്‍ നിന്ന് വ്യക്തമായി മനസിലാക്കണമെന്ന് നിര്‍ദേശമുണ്ട്.
പെരുന്നാള്‍ തിരക്കുകള്‍ അവസാനിച്ച ശേഷം അറ്റകുറ്റപ്പണികള്‍ തുടങ്ങി വേനലവധിക്ക് മുമ്പ് പൂര്‍ത്തിയാക്കാനാണ് ശ്രമം.ഇതിന് മുമ്പ് 2014ലാണ് ഇത്രയും ദൈര്‍ഘ്യമേറിയ അറ്റകുറ്റപ്പണികള്‍ നടന്നിട്ടുള്ളത്. തെക്ക് ഭാഗത്തെ റണ്‍വേ 2019ല്‍ സമാനമായ തരത്തില്‍ അടച്ചിട്ട് അറ്റകുറ്റപ്പണി നടത്തിയിരുന്നു. വിവിധ എയര്‍ലൈന്‍ കമ്പനികള്‍ മാറ്റത്തെക്കുറിച്ച് വാര്‍ത്താകുറിപ്പുകള്‍ ഇറക്കിയിട്ടുണ്ട്.