വാഷിങ്ടണ്‍: ഫലസ്തീനെതിരേയുള്ള ഇസ്‌റാഈല്‍ ആക്രമണത്തില്‍ ഇസ്‌റാഈല്‍ അനുകൂല നിലപാട് സ്വീകരിച്ച യു.എസ് പ്രസിഡന്റ് ജോ ബൈഡന്റെ നടപടിയില്‍ പ്രതിഷേധിച്ച് യു.എസിലെ മുസ്‌ലിം സംഘടനകള്‍ പ്രസിഡന്റിന്റെ ഈദ് വിരുന്ന് ബഹിഷ്‌കരിച്ചു.

ഞായറാഴ്ചയാണ് വിവിധ മുസ്‌ലിം സംഘടനകളുടെ പ്രതിനിധികളെ പ്രസിഡന്റ് ഈദ് വിരുന്നിന് ക്ഷണിച്ചത്. പ്രസിഡന്റ് ബൈഡനോടൊപ്പം വിരുന്നിന് പങ്കെടുക്കാവുന്ന സാഹചര്യത്തിലല്ല തങ്ങളെന്നും ഇസ്‌റാഈല്‍ വിഷയത്തില്‍ യു.എസ് ഭരണകൂടം നീതിയുക്തമായി പ്രവര്‍ത്തിക്കുമെന്ന് പ്രതീക്ഷിക്കുന്നതായും അമേരിക്കന്‍ ഇസ്‌ലാമിക് റിലേഷന്‍സ് കൗണ്‍സില്‍ എക്‌സിക്യൂട്ടീവ് ഡയരക്ടര്‍ നിഹാദ് അവാദ് പറഞ്ഞു. ഗസ്സയില്‍ സ്ത്രീകളും കുട്ടികളും ഉള്‍പ്പെടെ നിരപരാധികള്‍ കൊല്ലപ്പെടുകയാണ്. ഇത് തടയാനുള്ള രാഷ്ട്രീയ അധികാരം പ്രസിഡന്റ് ബൈഡനുണ്ട്. പ്രസിഡന്റ് ഇരകള്‍ക്കൊപ്പമാണ് നില്‍ക്കേണ്ടതെന്നും വേട്ടക്കാര്‍ക്കൊപ്പമല്ലെന്നും അദ്ദേഹം പറഞ്ഞു.