തിരൂര്‍ (മംഗലം): മസ്ജിദുല്‍ അഖ്‌സയിലും അധിനിവേശ കിഴക്കന്‍ ജെറുസലേമിലും ഇസ്രയേല്‍ ആക്രമണം നടത്തിയ ദിവസം
ജനിച്ച കുഞ്ഞിന് അഖ്‌സ എന്ന് നാമകരണം ചെയ്ത് ദമ്പതികളുടെ ഐക്യദാര്‍ഢ്യം. തിരൂര്‍ കൂട്ടായി കോതപറമ്പ് സ്വദേശികളായ വളപ്പില്‍ യൂനുസ് , സുല്‍ഫത്ത് ദമ്പതികളാണ് ഫലസ്തീന്‍ ജനതക്ക് ഐക്യദാര്‍ഢ്യം പ്രകടിപ്പിച്ച് ഇതേ ദിവസം തങ്ങള്‍ക്ക് ജനിച്ച പെണ്‍കുഞ്ഞിന് അഖ്‌സ എന്ന് പേര് നല്‍കിയത്. വിശുദ്ധ റമദാനിലെ അവസാനത്തെ വെളളിയാഴ്ച രാവിലെ ഒന്‍പത് മണിയോടെയാണ് സുല്‍ഫത്ത് പെണ്‍കുഞ്ഞിന് ജന്മം നല്‍കിയത്. ഈ ദിവസമായിരുന്നു ഫലസ്തീനികള്‍ക്കു നേരെയുള്ള ആക്രമണത്തിന് ഇസ്രായേല്‍ തുടക്കമിട്ടത്.

അവസാന വെളളി ആയതിനാല്‍ ആയിരക്കണക്കിനു ഫലസ്തീനികളാണ് മസ്ജിദുല്‍ അഖ്‌സയില്‍ എത്തിയിരുന്നത്. നിരവധി പേര്‍ക്ക് ഇസ്രായേല്‍ ആക്രമണത്തില്‍ പരുക്കേറ്റു.

രാത്രിയിലാണ് യൂനുസ് ഈ വാര്‍ത്തകളറിയുന്നത്. ഫലസ്തീന്‍ ജനതയുടെ വേദനയോര്‍ത്ത് മനസ് അസ്വസ്ഥമായി. ഭാര്യയുമായി വിഷയം പങ്കുവച്ചു. ഒടുവില്‍ ഫലസ്തീനികള്‍ക്ക് ഐക്യദാര്‍ഢ്യമായി ലോക ജനത ആദരിക്കുന്ന മസ്ജിദുല്‍ അഖ്‌സയുടെ പേര് തങ്ങളുടെ കുഞ്ഞിന് നല്‍കാന്‍ തീരുമാനിക്കുകയായിരുന്നുവെന്ന് യൂനുസ് പറഞ്ഞു. പ്രവാസിയായിരുന്ന യൂനുസ് ഇപ്പോള്‍ നാട്ടില്‍ പാചകത്തൊഴിലാളിയാണ്.