കൊച്ചി: രണ്ടാമതും മത വിദ്വേഷ പ്രസംഗം നടത്തിയതായി പരാതി ലഭിച്ച പി.സി ജോര്‍ജ്ജിനെ അറസ്റ്റ് ചെയ്യുമെന്ന് കൊച്ചി സിറ്റി പൊലിസ് കമ്മിഷണര്‍ സി.എച്ച്.നാഗരാജു വ്യക്തമാക്കി. എന്നാല്‍ തിടുക്കപ്പെട്ടുള്ള അറസ്റ്റുണ്ടാകില്ലെന്നും അദ്ദേഹം പറഞ്ഞു. കൊച്ചി വെണ്ണലയിലേക്ക് പ്രസംഗിക്കാന്‍ ക്ഷണിച്ചതില്‍ ഗൂഢാലോചനയുണ്ടോ എന്ന് അന്വേഷിക്കുമെന്നും അദ്ദേഹം പറഞ്ഞു.
ബോധപൂര്‍വമാണോ പരിപാടിയിലേക്ക് ക്ഷണമെന്ന് സംശയമുണ്ട്. പി.സി ജോര്‍ജിനെതിരെ നിലവില്‍ ഒരു കേസുണ്ടായിരിക്കേ അദ്ദേഹത്തെ വീണ്ടും ക്ഷണിച്ച് സമാന പ്രസംഗം ആവര്‍ത്തിക്കാനുള്ള പ്രേരണ സംഘാടകര്‍ ചെലുത്തിയോയെന്നും അന്വേഷിക്കും.
സംഘാടകര്‍ക്കെതിരെ ആവശ്യമെങ്കില്‍ കേസെടുക്കും. ജോര്‍ജ്ജിനെതിരെ ചുമത്തിയ 153 എ, 295 എ വകുപ്പുകള്‍ നിലനില്‍ക്കും.