തിരുവനന്തപുരം: കൊവിഡ് രണ്ടാംതരംഗം സംസ്ഥാനത്ത് ഗുരുതരമായി തുടരുന്നതിനിടെ പ്രതിരോധ രംഗത്തെ മുന്നണിപ്പോരാളികളായ ആരോഗ്യപ്രവര്‍ത്തകര്‍ കൂട്ടത്തോടെ രോഗബാധിതരാകുന്നു.

കൊവിഡ് കേസുകള്‍ രൂക്ഷമായി തുടരുന്നതിനിടെ ആരോഗ്യപ്രവര്‍ത്തകര്‍ കൊവിഡ് പിടിയിലാകുന്നത് വലിയ പ്രതിസന്ധിയാണ് സൃഷ്ടിക്കുന്നത്.ഒന്നരവര്‍ഷമായി തുടരുന്ന കൊവിഡ് പോരാട്ടത്തില്‍ ഓടിത്തളര്‍ന്നിട്ടും വീഴാതെ പിടിച്ചുനി ല്‍ക്കുന്നതിനിടെയാണ് പ്രതിദിനം നൂറിലധികം ആരോഗ്യപ്രവര്‍ത്തകര്‍ക്ക് രോഗം സ്ഥിരീകരിക്കുന്നത്.

10 ദിവസത്തിനിടെ 1,099 ആരോഗ്യപ്രവര്‍ത്തകര്‍ക്കാണ് സംസ്ഥാനത്ത് കൊവിഡ് ബാധിച്ചത്. ഒരു ദിവസം ശരാശരി 110 ആരോഗ്യപ്രവര്‍ത്തകരാണ് രോഗബാധിതരാകുന്നത്. ഇന്നലെ മാത്രം 104 പേര്‍ക്ക് രോഗം സ്ഥിരീകരിച്ചു. ആരോഗ്യപ്രവര്‍ത്തകര്‍ കൂടുതലായി കൊവിഡ് ബാധിതരായതോടെ മറ്റുള്ളവര്‍ക്ക് ജോലിഭാരം കൂടുകയാണ്.

ഈ പശ്ചാത്തലത്തില്‍ കെ.ജി.എം.ഒ.എ ഉള്‍പ്പെടെയുള്ള വിവിധ സംഘടകള്‍ കൂടുതല്‍ ആരോഗ്യപ്രവര്‍ത്തകരെ പ്രതിരോധ പ്രവര്‍ത്തനങ്ങള്‍ക്കായി നിയോഗിക്കണമെന്ന ആവശ്യവുമായി രംഗത്തെത്തിയിട്ടുണ്ട്.
ആദ്യതരംഗത്തെ അപേക്ഷിച്ച് രണ്ടാം തരംഗത്തില്‍ കൊവിഡ് ബാധിക്കുന്ന ആരോഗ്യപ്രവര്‍ത്തകരുടെ എണ്ണവും ഇരട്ടിയാണ്. ആദ്യഘട്ടത്തില്‍ പരമാവധി 50പേരായിരുന്നു രോഗികളെങ്കില്‍ ഇപ്പോള്‍ പ്രതിദിനം നൂറിലധികം പേര്‍ക്കാണ് രോഗം.
ഇതോടെ ആശുപത്രികള്‍ക്കുപുറത്ത് സി.എഫ്.എല്‍.ടി.സികളില്‍ ഉള്‍പ്പെടെ നിയോഗിക്കാന്‍ ആരോഗ്യപ്രവര്‍ത്തകര്‍ തികയാത്ത സ്ഥിതിയാണ്. ആരോഗ്യപ്രവര്‍ത്തകര്‍ പ്രതിരോധ വാക്‌സിനെടുത്തവരായതിനാല്‍ രോഗം ഗുരുതരമാകുന്നില്ലെന്നത് മാത്രമാണ് ഏക ആശ്വാസം.