തിരുവനന്തപുരം: കെ.കെ ശൈലജയ്ക്ക് മന്ത്രിസ്ഥാനം നല്‍കാത്തതുമായി ബന്ധപ്പെട്ടുയര്‍ന്ന വിവാദങ്ങളോട് പ്രതികരിച്ച് മുഖ്യമന്ത്രി പിണറായി വിജയന്‍. പുതിയ ആളുകള്‍ക്ക് അവസരം നല്‍കുകയെന്നതാണ് സി.പി.എം നിലപാടെന്നും ആര്‍ക്കും പ്രത്യേക പരിഗണനയോ ഇളവോ വേണ്ടെന്നാണ് തീരുമാനിച്ചതെന്നും മുഖ്യമന്ത്രി വാര്‍ത്താസമ്മേളനത്തില്‍ പറഞ്ഞു.

ഇളവ് കൊടുക്കുകയാണെങ്കില്‍ പലര്‍ക്കും ഇളവ് വേണ്ടിവരും. മികച്ച പ്രവര്‍ത്തനം കാഴ്ചവച്ച പലരുമുണ്ട്. ഇളവിന് പലരും അര്‍ഹരാണ്. പുതിയ ആളുകള്‍ക്ക് അവസരം നല്‍കുക എന്നതാണ് സി.പി.എം നിലപാട്.

ശൈലജയെ ഒഴിവാക്കിയതിലുള്ള രോഷം സര്‍ക്കാരിന്റെ പൊതുവായ പ്രവര്‍ത്തനത്തോടുള്ള മതിപ്പ് രേഖപ്പെടുത്തിക്കൊണ്ടുള്ളതാണ്. അതിനെ മാനിക്കുന്നു. മുന്‍ മന്ത്രിസഭയില്‍ പ്രവര്‍ത്തിച്ചവരെല്ലാം ഒന്നിനൊന്ന് മികവ് കാട്ടി.
അതില്‍ ആര്‍ക്കും പ്രത്യേക ഇളവ് വേണ്ടതില്ലെന്ന തീരുമാനമായിരുന്നു. അഭിപ്രായം പ്രകടിപ്പിച്ചവരുടെ ഉദ്ദേശശുദ്ധി മനസിലാക്കുന്നു. നാടും രാജ്യവും ലോകവും ശ്രദ്ധിച്ച ഒട്ടേറെ പേര്‍ സ്ഥാനാര്‍ഥിപ്പട്ടികയില്‍നിന്ന് ഒഴിവായത് മികവ് പരിഗണിക്കാതെയല്ല. പുതിയ ആളുകളെ കൊണ്ടുവരിക. അതായിരുന്നു കൂടുതല്‍ റിസ്‌കുള്ള കാര്യം. ബഹുജനം പൂര്‍ണമായി ആ നിലപാട് സ്വീകരിച്ചു. ഇതിലൊന്നും ദുരുദ്ദേശ്യമില്ല, സദുദ്ദേശ്യം മാത്രമേയുള്ളൂ. കൊവിഡ് പ്രതിരോധ പ്രവര്‍ത്തനം കൂട്ടായാണ് നടക്കുന്നത്. നല്ല മികവോടെ തുടര്‍ന്നും മുന്നോട്ടുപോകുമെന്നും മുഖ്യമന്ത്രി പറഞ്ഞു.