ജറൂസലം: 'ഉമ്മാ..എനിക്ക് പേടിയാവുന്നു...വല്ലാതെ പേടിയാവുന്നു. നമ്മളെല്ലാരും മരിച്ചാല്‍ നമ്മെ ഒരു ഖബറില്‍ അടക്കം ചെയ്യണേ..എനിക്ക് ഉമ്മാനെ കെട്ടിപ്പിടിക്കാലോ'. ഗസ്സയിലെ പത്തു വയസ്സുകാരി സൈനയുടെ കുറിപ്പാണിത്.

തലക്കു മുകളില്‍ ചീറിപ്പായുന്ന ഇസ്‌റാഈല്‍ ബോംബര്‍ വിമാനങ്ങള്‍ക്കു കീഴെ വല്ലാത്ത അവസ്ഥയിലാണ് ഗസ്സയിലെ കുഞ്ഞുങ്ങള്‍. ഉറക്കമില്ലാത്ത രാവുകളാണവരുടേത്. പകലുകളിലെ അവരുടെ കളികളില്‍ വെടിയും മരണവും മാത്രമാണ് നിഴലിക്കുന്നത്. മണ്ണപ്പം ചുടാനും കണ്ണുപൊത്തിക്കളിക്കാനും അവര്‍ മറന്നു പോയിരിക്കുന്നു. അല്ലെങ്കില്‍ അവര്‍ക്ക് പേടിയായിരിക്കാം, കണ്ണുപൊത്തി തുറക്കുമ്പോള്‍ നുറുങ്ങിയ ഏത് കുഞ്ഞുടലാണ് തങ്ങള്‍ക്കു മുമ്പില്‍ പിടയുന്നുണ്ടാവുക എന്നൊരു ഉള്‍ഭീതി ആ കുഞ്ഞു മനസ്സുകളില്‍ നിറയുന്നുണ്ടാവാം. ഏതുനിമിഷവും പൊട്ടിച്ചിതറിയേക്കാവുന്നതാണ് തങ്ങളുടെ ഉടലുകളെന്ന ചിന്തകളിലാണല്ലോ തീപൊരി ചിതറുന്ന അവരുടെ രാവുകളും പുകമൂടിയ അവരുടെ അവരുടെ പകലുകളും കടന്നു പോവുന്നത്.

'എന്റെ ഏറ്റവും പ്രിയപ്പെട്ട ഉമ്മാ...എനിക്ക് പേടിയാവുന്നു. ഒരുപാട് പേടിയാവുന്നു. നമ്മലെല്ലാവരും മരിക്കുകയാണെങ്കില്‍ നമ്മളെ ഒരു ഖബറില്‍ ഖബറടക്കണേ. എനിക്ക് ഉമ്മാനെ കെട്ടിപ്പിടിക്കാലോ. ഖബറിലേക്ക് വെക്കുമ്പോള്‍ പെരുന്നാള്‍ വസ്ത്രങ്ങള്‍ അണിയണമെന്നാണ് എനിക്കാശ. കാരണം ഇത്തവണ നം പെരുന്നാള്‍ ആഘോഷിച്ചിട്ടില്ലല്ലോ. പ്രിയപ്പെട്ട മകള്‍ സൈന. ദീര്‍ഘകാലം ജീവിക്കൂ പലസ്തീന്‍. കുഞ്ഞു സൈന ആശംസിക്കുന്നു.

ഗസ്സയിലെ മാധ്യമപ്രവര്‍ത്തകന്‍ വാലിദ് മഹമൂദ് ഫേ,്ബുക്കില്‍ പങ്കുവെച്ചതാണ് ഈ കുറിപ്പ്. തന്റെ ഹൃദയം കര്‍ക്കുന്നത് എന്ന് പറഞ്ഞാണ് അദ്ദേഹം സൈനയുടെ കത്ത് പങ്കുവെച്ചത്. സൈനയുടെ ഉമ്മക്ക് അവളുടെ തലയിണക്കടിയില്‍ നിന്ന് കിട്ടിയതാണ് എഴുത്ത്. ഒരു വസ്വിയത്തെന്ന പോലെ കുഞ്ഞു സൈന അവളുടെ സൂക്ഷിച്ചു വെച്ചതായിരിക്കാം ഇത്.

ഇപ്പോള്‍ നടക്കുന്ന സംഭവവികാസങ്ങള്‍ ഗസ്സയിലെ കുഞ്ഞുങ്ങളെ മാനസികമായും ശാരീരികമായും തകര്‍ത്തിരിക്കുന്നുവെന്ന് ലോകത്തെ ഓര്‍മിപ്പിക്കുന്നു വാലിദ്.