ന്യൂഡൽഹി
പാർട്ടിയെ വീണ്ടും ഉയരങ്ങളിലേക്ക് നയിക്കുകയെന്ന ലക്ഷ്യത്തോടെ കോൺഗ്രസിന്റെ ത്രിദിന നവ് സങ്കൽപ് ചിന്തൻ ശിബിറിന് ഇന്ന് രാജസ്ഥാനിലെ ഉദയ്പൂരിൽ തുടക്കം. ശിബിറിൽ പങ്കെടുക്കുന്നതിനായി രാഹുൽ അടക്കമുള്ള 75 നേതാക്കൾ ഇന്നലെ ട്രെയിൻ വഴി ഉദയ്പൂരിലേക്ക് പുറപ്പെട്ടു. സമീപകാല തെരഞ്ഞെടുപ്പുകളിൽ കോൺഗ്രസിന്റെ കനത്ത പരാജയത്തിന്റെ പശ്ചാത്തലത്തിലാണ് ചിന്തൻ ശിബിർ സംഘടിപ്പിക്കുന്നത്. പാർട്ടിയെ അടിമുടി നവീകരിക്കുന്നതിന്റെ തുടക്കമാവും ചിന്തൻ ശിബിറെന്നാണ് കരുതുന്നത്. 2024ലെ ലോക്‌സഭാ തെരഞ്ഞെടുപ്പിലേക്ക് പാർട്ടിയെ സജ്ജമാക്കുകയാണ് ശിബിറിന്റെ പ്രധാന ലക്ഷ്യം. പാർട്ടി നിയോഗിച്ച ആറു സമിതികൾ സമർപ്പിച്ച വിഷയങ്ങളുടെ അടിസ്ഥാനത്തിലായിരിക്കും ശിബിറിൽ ചർച്ചകൾ നടക്കുക. ജി 23 നേതാക്കളിൽ ചിലരും ഈ സമിതികളിൽ ഉൾപ്പെട്ടിട്ടുണ്ട്. സമിതികൾ റിപ്പോർട്ട് നേരത്തെ തന്നെ പാർട്ടി അധ്യക്ഷ സോണിയ ഗാന്ധിക്ക് സമർപ്പിച്ചിരുന്നു.
ഒരാൾക്ക് ഒരു പദവി, യുവാക്കൾക്ക് കൂടുതൽ പ്രാതിനിധ്യം തുടങ്ങിയ വിഷയങ്ങൾ പ്രധാന ചർച്ചയാവും. എം.പിമാർ, എം.എൽ.എമാർ, പാർട്ടിയുടെ വിവിധ ഭാരവാഹികൾ അടക്കം 430 നേതാക്കളാണ് ചിന്തൻ ശിബിറിൽ പങ്കെടുക്കുന്നത്. 1998ൽ മധ്യപ്രദേശിലെ പച്ച്മർഹി, 2003ൽ ഷിംല, 2013ൽ ജയ്പൂർ എന്നിവിടങ്ങളിലാണ് നേരത്തെ ചിന്തൻ ശിബിർ നടന്നത്.