ബ്യൂണസ് ഐറിസ്: ലോക ചാമ്പ്യന്‍മാരായതിന് ശേഷമുള്ള അര്‍ജന്റീനയുടെ ആദ്യ മത്സരത്തില്‍ തന്നെ തന്റെ കരിയറിലെ 800ാം ഗോള്‍ നേടി ലയണല്‍ മെസി. പനാമയുമായി നടന്ന സൗഹൃദ മത്സരത്തില്‍ രണ്ട് ഗോളുകള്‍ക്ക് അര്‍ജന്റീന വിജയിച്ചപ്പോളും തിളങ്ങിയത് മെസി തന്നെയാണ്.

ഗോള്‍ രഹിതമായിരുന്നു ആദ്യ പകുതി. രണ്ടാം പകുതിയുടെ അവസാന നിമിഷങ്ങളിലാണ് അര്‍ജന്റീന വിജയഗോള്‍ കണ്ടെത്തിയത്. 78ാം മിനിറ്റില്‍ അല്‍മാഡയും 89ാം മിനിറ്റില്‍ ഫ്രീകിക്കിലൂടെ ലയണല്‍ മെസിയും ഗോള്‍ നേടി. മെസിയുടെ ഗോള്‍ നേട്ടത്തോടെ 800 ഗോളുകള്‍ പൂര്‍ത്തിയാക്കുന്ന താരമായി.

78ാം മിനിറ്റില്‍ പിറന്ന ഗോളിന് പിന്നിലും മെസിയുടെ ഫ്രീകിക്കായിരുന്നു. 77ാം മിനിറ്റില്‍ മെസി എടുത്ത ഫ്രീകിക്ക് ക്രോസ് ബാറില്‍ കൊണ്ട് തിരികെ എത്തി. ഇത് അല്‍മാഡ ഗോളാക്കി മാറ്റുകയായിരുന്നു.

പാനമയ്‌ക്കെതിരെ ഇരട്ട ഗോള്‍ നേടിയാല്‍ അന്താരാഷ്!ട്ര കരിയറില്‍ 100 ഗോളിലെത്തുന്ന മൂന്നാമത്തെ താരമാകുമായിരുന്നു മെസി. പാനമയ്‌ക്കെതിരെ ഇറങ്ങുമ്പോള്‍ 98 ഗോളുകളുണ്ടായിരുന്ന മെസിയുടെ നേട്ടം 99ലെത്തി.