കൊച്ചി: സ്വര്‍ണക്കടത്ത് കേസിലെ പ്രതി സ്വപ്‌ന സുരേഷിന്റെ ചിത്രത്തിനൊപ്പം തന്റെ ചിത്രം എഡിറ്റ് ചെയ്ത് ചേര്‍ത്ത് വ്യാജ പ്രചരണം നടത്തുന്നതിനെതിരെ പ്രതിപക്ഷ നേതാവ് വി.ഡി സതീശന്‍ പൊലിസില്‍ പരാതി നല്‍കി. ഡി.ജി.പിക്കും സൈബര്‍ സെല്ലിനുമാണ് പരാതി നല്‍കിയത്. തെരഞ്ഞെടുപ്പ് വിജയത്തില്‍ ഉമാ തോമസിനെ അഭിനന്ദിക്കുന്ന ഫോട്ടോയില്‍ ഉമ തോമസിന്റ മുഖത്തിന്റെ സ്ഥാനത്ത് സ്വപ്‌ന സുരേഷിന്റെ ചിത്രം എഡിറ്റ് ചെയ്ത് ചേര്‍ത്താണ് വ്യാജപ്രചാരണം.

'കൈ വിടരുത്, തെരഞ്ഞെടുപ്പ് വരെ കട്ടയ്ക്ക് കൂടെയുണ്ടാകണം' എന്ന അടിക്കുറിപ്പോടുകൂടിയാണ് ചിത്രം പ്രചരിച്ചത്. ഇടത് സൈബര്‍ ഗ്രൂപ്പുകളില്‍ പ്രത്യക്ഷപ്പെട്ട ചിത്രം സമൂഹമാധ്യമങ്ങളില്‍ പ്രചരിച്ചതിന് പിന്നാലെയാണ് വിഡി സതീശന്‍ വ്യാജ പ്രചാരണത്തിനെതിരെ രംഗത്ത് വന്നത്.