ന്യൂഡല്‍ഹി: കൊവിഡുമായി ബന്ധപ്പെട്ട് കേരളത്തിലുള്‍പ്പെടെ നടപ്പാക്കിയ മികച്ച മാതൃകകള്‍ നിര്‍ദേശിച്ച് കേന്ദ്രസര്‍ക്കാര്‍. വിവിധ സംസ്ഥാനങ്ങളിലെ 14 മികച്ച മാതൃകകളാണ് ആരോഗ്യമന്ത്രാലയം മുന്നോട്ടുവച്ചത്. കേരളത്തിലെ ഓക്‌സിജന്‍ നഴ്‌സ് മാതൃകയും കേന്ദ്രം മുന്നോട്ടുവച്ചവയില്‍ ഉള്‍പ്പെടും.
വ്യാഴാഴ്ച പ്രധാനമന്ത്രി നരേന്ദ്രമോദി വിവിധ സംസ്ഥാനങ്ങളിലെ 54 ജില്ലകളിലെ കലക്ടര്‍മാരുമായി ഓണ്‍ലൈന്‍ കൂടിക്കാഴ്ച നടത്തിയിരുന്നു. കൂടിക്കാഴ്ചയില്‍ എറണാകുളം കലക്ടര്‍ എസ്. സുഹാസാണ് ഓക്‌സിജന്‍ നഴ്‌സ് മാതൃക വിശദീകരിച്ചത്.

ഹരിയാനയിലെ ഗുരുഗ്രാമില്‍ ജോലി സ്ഥലങ്ങളില്‍ നടപ്പാക്കിയ വാക്‌സിനേഷന്‍, ആശുപത്രി സൗകര്യങ്ങളുടെ ലഭ്യത അറിയാന്‍ ഹരിയാനയില്‍ വികസിപ്പിച്ച ഡിജിറ്റല്‍ പോര്‍ട്ടല്‍, യു.പിയിലെ കാശി കൊവിഡ് റെസ്‌പോണ്‍സ് സെന്റര്‍, തമിഴ്‌നാട്ടിലെ ടാക്‌സി ആംബുലന്‍സ്, മഹാരാഷ്ട്രയില്‍ സന്നദ്ധ സംഘടനകളുടെ സഹായത്തോടെ കൊവിഡ് കെയര്‍ സെന്ററുകളിലെ ഭക്ഷണ വിതരണം, രാജസ്ഥാനിലെ ബിക്കാനഗറില്‍ മൊബൈല്‍ ഒ.പി.ഡി, യു.പിയില്‍ വീടുകള്‍ തോറും നടത്തിയ കൊവിഡ് പരിശോധന, ഐസൊലേഷനില്‍ കഴിയുന്നവരെ നിരീക്ഷിക്കാന്‍ ബിഹാറിലെ പട്‌നയില്‍ നടപ്പാക്കിയ എച്ച്.ഐ.ടി കൊവിഡ് മൊബൈല്‍ ആപ്പ് തുടങ്ങിയ മാതൃകകളാണ് കേന്ദ്രം എടുത്തുപറഞ്ഞത്.