ന്യൂഡല്‍ഹി: പശ്ചിഘട്ടസംരക്ഷണം സംബന്ധിച്ച കസ്തൂരിരംഗന്‍ റിപ്പോര്‍ട്ടിന്റെ അടിസ്ഥാനത്തില്‍ ഇടുക്കി ജില്ലയിലെ ഒരിടവും പരിസ്ഥിതി ലോല മേഖലയായി പ്രഖ്യാപിച്ചിട്ടില്ലെന്ന് ദേശീയ ഹരിതകോടതിയുടെ ചെന്നൈ ബഞ്ച് വ്യക്തമാക്കി. കസ്തൂരിരംഗന്‍ റിപ്പോര്‍ട്ടിന്റെ അടിസ്ഥാനത്തില്‍ കരട്‌വിജ്ഞാപനം പുറപ്പെടുപ്പിച്ചതിനെ തുടര്‍ന്ന് പ്രദേശവാസികള്‍ക്കുണ്ടായ ആശങ്ക പരിഹരിക്കപ്പെടേണ്ടതാണെന്നും ബെഞ്ച് ചൂണ്ടിക്കാട്ടി. അതേസമയം, അന്തിമ വിജ്ഞാപനം വൈകാതെ പുറത്തിറക്കുമെന്നും ഇതിനായി കരട് വിജ്ഞാപനം പുറപ്പെടുവിച്ച് 545 ദിവസത്തെ സാവകാശം നിയമപരമായി ഉണ്ടെന്നും കേന്ദ്ര വനം-പരിസ്ഥിതി മന്ത്രാലയം കോടതിയെ അറിയിച്ചു.
കസ്തൂരിരംഗന്‍ റിപ്പോര്‍ട്ട് സമര്‍പ്പിച്ചതോടെ മലയോര മേഖലയില്‍ തെറ്റായ പ്രചരണം നടത്തി ഭൂമാഫിയ പിടിമുറുക്കിയിരിക്കുകയാണെന്നും ഇത് മലയോരവാസികളുടെ ആശങ്ക വര്‍ധിപ്പിച്ചെന്നും ചൂണ്ടിക്കാട്ടി കോണ്‍ഗ്രസ് നേതാവും അഭിഭാഷകനുമായ മാത്യു കുഴല്‍നാടന്‍ സമര്‍പ്പിച്ച ഹരജിയിലാണ് ചെന്നൈ ബെഞ്ചിന്റെ മറുപടി.