തലശ്ശേരി: നിരവധി മോഷണക്കേസുകളില്‍ പ്രതിയായ യുവാവിനെ പൊലിസ് അറസ്റ്റു ചെയ്തു. കുറ്റ്യാടി കായക്കൊടിയിലെ മങ്കിലേരി പാറേമ്മല്‍ അജ്മലിനെ (27)യാണ് സി.ഐ പ്രദീപന്‍ കണ്ണിപ്പൊയിലിന്റെ നേതൃത്വത്തിലുള്ള സംഘം പിടികൂടിയത്.
പിടിച്ചുപറി, വാഹന മോഷണം, ഭവനഭേദനം തുടങ്ങി നിരവധി കേസുകളില്‍ ഇയാള്‍ പ്രതിയാണെന്നു പൊലിസ് പറഞ്ഞു.
അഞ്ചു സ്വര്‍ണവളകള്‍ വില്‍ക്കാന്‍ ശ്രമിക്കവേ രഹസ്യവിവരം ലഭിച്ചതിനെ തുടര്‍ന്ന് പുതിയ ബസ്സ്റ്റാന്‍ഡ് പരിസരത്തുവച്ചാണ് ഇയാളെ പിടികൂടിയത്. കഴിഞ്ഞ ജൂണില്‍ നാദാപുരം കക്കംപള്ളി കുഞ്ഞാലി ഹാജിയുടെ മകള്‍ റസീനയുടെ വീട്ടില്‍ നിന്നു 26 പവന്‍ ആഭരണങ്ങളും അരലക്ഷം രൂപയും മോഷ്ടിച്ച കേസില്‍ പ്രതിയാണ് അജ്മല്‍. നാദാപുരം പൊലിസ് അന്വേഷണം നടത്തുന്നതിനിടെയാണ് ഇയാള്‍ പിടിയിലായത്. കൂട്ടുപ്രതിക്കായി പൊലിസ് അന്വേഷണം തുടങ്ങി.