ജറൂസലേം: ഗസ്സയില്‍ നിന്നുള്ള ഹമാസ് ആക്രമണം ഭയന്ന് ബങ്കറിലായിരുന്ന ഇസ്‌റാഈല്‍ കുടുംബങ്ങള്‍ വീടുകളില്‍ തിരികെയെത്തി.

ഒരു സൈനികന്‍ കൂടി ഹമാസ് ആക്രമണത്തില്‍ മരിച്ചതായി ഇസ്‌റാഈല്‍ സൈന്യം സ്ഥിരീകരിച്ചു. സമ്പൂര്‍ണ വാക്‌സിനേഷന് പിന്നാലെ ഇസ്‌റാഈലില്‍ സാധാരണ ജനജീവിതം തുടരുമ്പോഴാണ് സംഘര്‍ഷം ഉടലെടുത്തത്. ഹമാസ് ശക്തമായി തിരിച്ചടിച്ചതോടെ ഇസ്‌റാഈല്‍ പൗരന്മാര്‍ ബങ്കറുകളിലൊളിച്ചു. വെടിനിര്‍ത്തല്‍ പശ്ചാത്തലത്തില്‍ ഞായറാഴ്ചക്ക് ശേഷം സ്‌കൂളുകളും മറ്റും തുറന്നു പ്രവര്‍ത്തിക്കും. ഇസ്‌റാഈല്‍ സൈന്യം പറയുന്നത് പ്രകാരം 4500 മിസൈലുകളാണ് ഹമാസ് വര്‍ഷിച്ചത്. ഇതില്‍ 90 ശതമാനവും അയേണ്‍ ഡോം പ്രതിരോധ സംവിധാനം നിര്‍വീര്യമാക്കി. പക്ഷേ റോക്കറ്റ് അവശിഷ്ടങ്ങള്‍ പതിച്ച് വീടുകള്‍ തകര്‍ന്നു. തെക്കന്‍ ഇസ്‌റാഈല്‍ കേന്ദ്രീകരിച്ചാണ് കൂടുതല്‍ ആക്രമണങ്ങളും നടന്നത്. ഇവിടെ ആളുകള്‍ ബങ്കറുകളിലാണ് കഴിഞ്ഞുകൂടിയത്. വെടിനിര്‍ത്തല്‍ പ്രഖ്യാപിക്കപ്പെട്ടതോടെ ഗസ്സയിലെന്നോണം ഇസ്‌റാഈലിലും ജനങ്ങള്‍ തെരുവിലിറങ്ങി ആഘോഷിച്ചു.