ദോഹ: ഇസ്‌റാഈലും ഫലസ്തീനും തമ്മിലുള്ള വെടിനിര്‍ത്തല്‍ പ്രഖ്യാപനം സാധ്യമാക്കിയതിന് ഖത്തറിനെ പ്രശംസിച്ച് യു.എന്‍ സെക്രട്ടറി ജനറല്‍ ആന്റോണിയോ ഗുട്ടെറസ്.

 പശ്ചിമേഷ്യന്‍ സമാധാന ശ്രമങ്ങള്‍ക്കായുള്ള യു.എന്‍ സ്‌പെഷല്‍ കോഡിനേറ്റര്‍ വെടിനിര്‍ത്തലിന് പിന്നാലെ ഖത്തറിലെത്തി. 

ഖത്തറിന്റെയും ഈജിപ്തിന്റെയും നിര്‍ണായക ഇടപെടലുകളും മധ്യസ്ഥ നീക്കങ്ങളുമാണ് വെടിനിര്‍ത്തലിലേക്ക് നയിച്ചതെന്നും ഇക്കാര്യത്തില്‍ ഇരുരാജ്യങ്ങളെയും അഭിനന്ദിക്കുന്നതായും അദ്ദേഹം പറഞ്ഞു.

 

 ഗസ്സയെ എത്രയും പെട്ടെന്ന് പഴയ അവസ്ഥയിലേക്ക് തിരിച്ചുകൊണ്ടുവരുന്നതിനും പുനര്‍നിര്‍മാണത്തിനും ആഗോള സമൂഹത്തിന്റെ പിന്തുണയും സഹായവുമുണ്ടാകണമെന്നും അദ്ദേഹം ആവശ്യപ്പെട്ടു.പശ്ചിമേഷ്യന്‍ സമാധാനത്തിനായി നിയോഗിച്ച യു.എന്‍ പ്രത്യേക കോഡിനേറ്റര്‍ ടോര്‍ വെന്നെസ്ലാന്റ് ഇതിനുപിന്നാലെ ദോഹയിലെത്തി. 

ഖത്തര്‍ ഉപപ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിന്‍ അബ്ദുറഹ്മാന്‍ ആല്‍ത്താനിയുമായി അദ്ദേഹം കൂടിക്കാഴ്ച നടത്തി.

 ഫലസ്തീനില്‍ ഏറ്റവും ഒടുവിലായി നടന്ന മുഴുവന്‍ വിഷയങ്ങളും ഇരുവരും ചര്‍ച്ച ചെയ്തു. വെടിനിര്‍ത്തല്‍ സാധ്യമാക്കുന്നതിനായി യു.എന്‍ നടത്തിയ നീക്കങ്ങള്‍ക്ക് വിദേശകാര്യമന്ത്രി നന്ദി പ്രകടിപ്പിച്ചു.