കണ്ണൂര്‍: ജനാധിപത്യം കോണ്‍ഗ്രസില്‍ നിലച്ചുപോയിട്ടില്ലെന്നതിന്റെ തെളിവാണ് പ്രതിപക്ഷ നേതാവായി വി.ഡി സതീശന്റെ നിയമനമെന്ന് കെ.പി.സി.സി വര്‍ക്കിങ് പ്രസിഡന്റ് കെ.സുധാകരന്‍ എം.പി. 

കുറേക്കാലമായി കോണ്‍ഗ്രസില്‍ ഉന്നയിക്കപ്പെടുന്ന തലമുറ മാറ്റത്തെയാണ് ഹൈക്കമാന്‍ഡ് അംഗീകരിച്ചത്. ബാക്കിമാറ്റങ്ങള്‍ പിറകെ വരുമെന്നാണു കരുതുന്നത്. ആരുടെയും നോമിനിയായല്ല സതീശന്‍ പ്രതിപക്ഷ നേതാവായത്. ഗ്രൂപ്പിനതീതമായാണു തെരഞ്ഞെടുപ്പ്. കഴിവും പ്രാപ്തിയുമുള്ളവരെ കണ്ടെത്തി അവരെ ഓരോ ഘടകങ്ങള്‍ ഏല്‍പിക്കണമെന്നും അദ്ദേഹം ആവശ്യപ്പെട്ടു.

പ്രതിപക്ഷ നേതാവെന്ന നിലയില്‍ രമേശ് ചെന്നിത്തല മികച്ച പ്രവര്‍ത്തനമാണു കാഴ്ചവച്ചത്. എന്നാല്‍ യുവാക്കളുടെ ആവശ്യമാണ് ഇപ്പോള്‍ അംഗീകരിക്കപ്പെട്ടത്. പ്രതിപക്ഷ നേതൃസ്ഥാനത്തെ മാറ്റത്തിന്റെ തുടര്‍ച്ചയായി കെ.പി.സി.സി പ്രസിഡന്റ് സ്ഥാനത്തും മാറ്റമുണ്ടാകുമെന്നാണു പ്രതീക്ഷിക്കുന്നത്. 

 

പുതിയ തലമുറയെ കോണ്‍ഗ്രസ് നേതൃസ്ഥാനത്തു കൊണ്ടുവരും. കെ.പി.സി.സിയിലും തലമുറ മാറ്റത്തിന് ഹൈക്കമാന്‍ഡ് തയാറാകുമെന്നാണു പ്രതീക്ഷ. കെ.പി.സി.സി അധ്യക്ഷ സ്ഥാനത്തേക്കു തന്റെ പേര് ഉയര്‍ന്നുവന്നിട്ടുണ്ടെങ്കിലും ഇതുവരെ ഉത്തരവാദപ്പെട്ട ഒരുനേതാവും ഇതുസംബന്ധിച്ച് തന്നോടു സംസാരിച്ചിട്ടില്ലെന്നും താന്‍ ആവശ്യപ്പെട്ടിട്ടില്ലെന്നും അദ്ദേഹം മാധ്യമപ്രവര്‍ത്തകരോടു പറഞ്ഞു.