എടവണ്ണപ്പാറ: കാണാതായ വിദ്യാര്‍ഥിയെ മണിക്കൂറുകള്‍ക്കുള്ളില്‍ കണ്ടെത്തി എസ്.കെ.എസ്.എസ്.എഫ് വിഖായ പ്രവര്‍ത്തകര്‍ മാതൃകയായി. വെള്ളിയാഴ്ച വൈകീട്ട് സ്‌കൂള്‍ വിട്ടതിനുശേഷം വാഴക്കാട് നിന്ന് കാണാതായ പന്ത്രണ്ട് വയസുകാരനെയാണ് രാത്രി പത്തുമണിയോടെ വിഖായ പ്രവര്‍ത്തകര്‍ കോഴിക്കോട് നിന്ന് കണ്ടെത്തി കുടുംബത്തിനു കൈമാറിയത്.
സ്‌കൂള്‍ സമയം കഴിഞ്ഞു ഏറെ വൈകിയിട്ടും വിദ്യാര്‍ഥി വീട്ടിലെത്തിയിരുന്നില്ല . ഉടന്‍തന്നെ കോഴിക്കോട്, മെഡിക്കല്‍ കോളജ് തുടങ്ങിയ സ്ഥലങ്ങളില്‍ കുടുംബവും നാട്ടുകാരും അന്വേഷണം നടത്തിയിരുന്നെങ്കിലും കണ്ടെത്താനായില്ല . മലപ്പുറം ജില്ലാ വിഖായ ചീഫ് കോ ഓര്‍ഡിനേറ്റര്‍ വാഴക്കാട് സ്വദേശിയായ ഉമറലി ശിഹാബ് സംസ്ഥാന കണ്‍വീനറായ സലാം ഫറോക്കുമായി ബന്ധപ്പെടുകയും സിറ്റി വിഖായ പ്രവര്‍ത്തകരോടൊപ്പം ബീച്ചിലും മറ്റുമായി തിരച്ചില്‍ നടത്തുകയുമായിരുന്നു.
 യൂനിഫോം ധരിച്ച കുട്ടിയെ കണ്ടതായി ബീച്ചിലെ ഒരു കച്ചവടക്കാരന്‍  പറഞ്ഞതനുസരിച്ചു ബീച്ചില്‍ തിരച്ചില്‍ നടത്തി. ഗുജറാത്തി ഹാളിനു എതിര്‍വശത്തായി കണ്ടെത്തിയ കുട്ടിയെ പിടികൂടുകയും പൊലിസ് മുഖേന കുടുംബത്തെ ഏല്‍പ്പിക്കുകയുമായിരുന്നു . കുട്ടിയെ കിട്ടിയതോടെ ഏറെ സന്തോഷത്തിലായ കുടുംബവും പൊലിസും വിഖായ പ്രവര്‍ത്തകര്‍ക്കു നന്ദി പറഞ്ഞാണ് പിരിഞ്ഞത്.