തിരുവനന്തപുരം: സംസ്ഥാനത്ത് കൂടുതല്‍ വിദേശ നിക്ഷേപം ആകര്‍ഷിക്കാനുള്ള ദൗത്യം ഏറ്റെടുക്കണമെന്ന് മുഖ്യമന്ത്രി പിണറായി വിജയന്‍ പ്രവാസി വ്യവസായി എം.എ യൂസഫലിയോട് അഭ്യര്‍ഥിച്ചു.  ലുലു മാളിന്റെ നിര്‍മാണത്തിന് തിരുവനന്തപുരം ദേശീയപാതയില്‍ ആക്കുളത്ത് ശിലാസ്ഥാപനം നിര്‍വഹിച്ച ശേഷം സംസാരിക്കുകയായിരുന്നു മുഖ്യമന്ത്രി. പുതിയ വ്യവസായങ്ങളെയും സംരംഭകരെയും സ്വീകരിക്കാന്‍ കേരളത്തിന് സന്തോഷമേയുള്ളൂ. വലിയ തോതിലുള്ള വികസനമാണ് ലുലു മാളിലൂടെ തലസ്ഥാനത്തിന് ലഭിക്കാന്‍ പോകുന്നത്. ആയിരക്കണക്കിന് ആളുകള്‍ക്ക് തൊഴില്‍ നല്‍കാന്‍ യൂസഫലിക്ക് സാധിക്കുമെന്നാണ് പ്രതീക്ഷ.
ഗള്‍ഫിലെ നിക്ഷേപകര്‍ക്ക് യാതൊരു ആശങ്കയും ഇല്ലാതെ കേരളത്തിലേക്ക് കടന്നുവരാം. കേരളം വ്യവസായത്തെ പ്രോത്സാഹിപ്പിക്കുന്ന സംസ്ഥാനമാണ്. പുറത്തുനിന്നുള്ളവരെ കേരളത്തിലേക്ക് ആകര്‍ഷിക്കാന്‍ യൂസഫലിയുടെ സംരംഭങ്ങളിലൂടെ കഴിയും. ഇതിന് യൂസഫലിതന്നെ മുന്‍കൈ എടുക്കണം. അതിന് ഉറപ്പുനല്‍കുന്നതില്‍ ഒരു മടിയും ഉണ്ടാകേണ്ടതില്ലെന്നും അദ്ദേഹം പറഞ്ഞു.
 പ്രതിപക്ഷ നേതാവ് രമേശ് ചെന്നിത്തല ചടങ്ങില്‍ അധ്യക്ഷനായി. മാളിന്റെ മോഡല്‍ അനാച്ഛാദനം മന്ത്രി കടകംപള്ളി സുരേന്ദ്രനും ഹോട്ടലിന്റെയും കണ്‍വന്‍ഷന്‍ സെന്ററിന്റെയും മോഡല്‍ അനാച്ഛാദനം മന്ത്രി ഇ.ചന്ദ്രശേഖരനും പൈലിങ് സ്വിച്ച് ഓണ്‍ കര്‍മം  ശശി തരൂര്‍ എം.പിയും നിര്‍വഹിച്ചു. ഒ.രാജഗോപാല്‍ എം.എല്‍.എ മാളിന്റെ ബ്രോഷര്‍ ശിവഗിരി മഠം ജനറല്‍ സെക്രട്ടറി സ്വാമി ഋതംബരാനന്ദയ്ക്ക് നല്‍കി പ്രകാശനം ചെയ്തു. പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി വെബ്‌സൈറ്റ് ഉദ്ഘാടനം ചെയ്തു. 2018 ഓഗസ്റ്റോടെ ഷോപ്പിങ് മാളിന്റെയും 2019 മാര്‍ച്ചോടെ ഹോട്ടലിന്റെയും കണ്‍വന്‍ഷന്‍ സെന്ററിന്റെയും നിര്‍മാണം പൂര്‍ത്തിയാക്കുമെന്ന്  എം.എ യൂസഫലി പറഞ്ഞു.