മഥുര: മഥുരയിലെ ഷാഹി ഈദ്ഗാഹ് മസ്ജിദ് പൊളിച്ചു നീക്കണമെന്ന് ആവശ്യപ്പെട്ട് സമര്‍പ്പിച്ച ഹര്‍ജി ജില്ലാ കോടതി ഫയലില്‍ സ്വീകരിച്ചു. മസ്ജിദിന്റെ നിര്‍മാണം നിയമവിരുദ്ധമാണെന്നും ശ്രീകൃഷ്ണന്റെ ജന്മസ്ഥലത്താണു പള്ളി നിര്‍മ്മിച്ചിരിക്കുന്നതെന്നും ഹര്‍ജിയില്‍ ചൂണ്ടിക്കാണിക്കുന്നു.

നേരത്തെ ഹര്‍ജി നിലനില്‍ക്കില്ലെന്നു സിവില്‍ കോടതി വിധിച്ചിരുന്നു. ഇതിനെതിരായ അപ്പീലിലാണു ഹര്‍ജി നിലനില്‍ക്കുന്നതാണെന്നു ജില്ലാ ജഡ്ജി രാജീവ് ഭാരതി വ്യക്തമാക്കി. കൃഷ്ണ ജന്മഭൂമിയിലാണ് പള്ളി സ്ഥിതിചെയ്യുന്നതെന്നാണ് ഹരജിക്കാരന്റെ അവകാശവാദം.

13.37 ഏക്കര്‍ ഭൂമിയുടെ ഉടമസ്ഥതാവകാശമാണ് ഇവര്‍ ഉന്നയിക്കുന്നത്. ജില്ലാ സെഷന്‍സ് ജഡ്ജ് രാജീവ് ഭാരതിയാണ് സിവില്‍ കോടതി നേരത്തെ തള്ളിയ ഹരജി ഫയലില്‍ സ്വീകരിച്ചത്. അഗ്‌നിഹോത്രിയും മറ്റു രണ്ടുപേരും സമാനമായ ഹരജി രണ്ടുവര്‍ഷം മുമ്പ് സിവില്‍ കോടതിയില്‍ നല്‍കിയെങ്കിലും തള്ളിയിരുന്നു.

2020 ഓക്ടോബര്‍ 16ന് റിവിഷന്‍ ഹരജിയുമായി ജില്ലാ കോടതിയെ സമീപിച്ചു. തുടര്‍ന്ന് 1991ലെ പ്ലേസ് ഓഫ് വൊര്‍ഷിപ്പ് നിയമപ്രകാരം കോടതി ഫയലില്‍ സ്വീകരിക്കുകയായിരുന്നു.