വണ്ടിപ്പെരിയാര്‍: കഴിഞ്ഞ ദിവസം അന്തരിച്ച സുപ്രഭാതം സീനിയര്‍ റിപ്പോര്‍ട്ടര്‍ യു.എച്ച് സിദ്ദീഖിന്റെ ഛായാചിത്രം വണ്ടിപ്പെരിയാര്‍ ഇന്ദിരാ ഭവനില്‍ മുന്‍ പ്രതിപക്ഷ നേതാവ് രമേശ് ചെന്നിത്തല അനാച്ഛാദനം ചെയ്തു. സിദ്ദീഖിന്റെ വേര്‍പാടിലൂടെ നഷ്ടമായത് അര്‍പ്പണ ബോധവും സമൂഹ്യ പ്രതിബദ്ധതയുമുള്ള മാധ്യമ പ്രവര്‍ത്തകനെയാണെന്ന് അദ്ദേഹം പറഞ്ഞു. സംസ്ഥാനത്തെ പ്രമുഖ സ്‌പോര്‍ട്‌സ് ജേണലിസ്റ്റായിരുന്ന സദ്ദീഖുമായി തനിക്ക് ഏറെ വ്യക്തി ബന്ധമുണ്ടായിരുന്നുവെന്ന് അദ്ദേഹം കൂട്ടിച്ചേര്‍ത്തു.

ഐ.എന്‍.ടി.യു.സി സംസ്ഥാന പ്രസിഡന്റ് ആര്‍. ചന്ദ്രശേഖരന്‍, മുന്‍ എം.എല്‍.എ ഇ.എം. ആഗസ്തി, മുന്‍ ഡി.സി.സി പ്രസിഡന്റ് ജോയി തോമസ്, ജോണി കുളംപള്ളി, ആന്റണി കുഴിക്കാട്ട്, എം. ഉദയസൂര്യന്‍, ഷാജി പൈനാടത്ത്, പി.ആര്‍ അയ്യപ്പന്‍ തുടങ്ങിയവര്‍ സംബന്ധിച്ചു. കെ.എസ്.യു പീരുമേട് താലൂക്ക് സെക്രട്ടറി, യൂത്ത് കോണ്‍ഗ്രസ് ബ്ലോക്ക് സെക്രട്ടറി, ഐ.എന്‍.ടി.യു.സി ഓഫിസ് സെക്രട്ടറി എന്നീ നിലകളില്‍ സിദ്ദീഖ് പ്രവര്‍ത്തിച്ചിട്ടുണ്ട്.