പാലക്കാട്: നിയമസഭാ തെരഞ്ഞെടുപ്പുമായി ബന്ധപ്പെട്ട് തനിക്കും കുടുംബത്തിനുമെതിരേ നീചമായ രീതിയില്‍ അപവാദപ്രചരണങ്ങളും കടുത്ത പകപോക്കലുമുണ്ടായെന്ന പരാതിയുമായി കേന്ദ്രനേതൃത്വത്തിനുമുന്നില്‍ മുന്‍ മന്ത്രിയും സി.പി.എം മുതിര്‍ന്ന നേതാവുമായ എ.കെ ബാലന്‍.

അപവാദപ്രചരണങ്ങളുണ്ടായ ഘട്ടത്തില്‍ മൗനം പാലിച്ചത് ഇടതുസര്‍ക്കാരിന്റെ ഭരണത്തുടര്‍ച്ചയുടെ സാധ്യതകള്‍ക്ക് മങ്ങലേല്‍ക്കരുതെന്ന ചിന്തകൊണ്ടാണെന്നും ബാലന്‍ നേൃത്വത്തോടു വ്യക്തമാക്കി.
തെരഞ്ഞെടുപ്പില്‍ തന്റെ ഭാര്യ ജമീലയ്ക്കു സീറ്റ് വേണമെന്ന് ആരോടും ആവശ്യപ്പെട്ടിട്ടില്ല. സംസ്ഥാന നേതാക്കള്‍ക്കിടയില്‍ ജമീലയെ പരിഗണിക്കണമെന്ന പ്രതികരണങ്ങള്‍ വന്നപ്പോള്‍ തന്നെ തനിക്കും ഭാര്യ ജമീലയ്ക്കുമെതിരേ വ്യക്തിഹത്യയും അപവാദപ്രചരണങ്ങളും വ്യാപകമായി തുടങ്ങിയിരുന്നു.
ജമീല ജയിച്ചുവന്നാല്‍ തന്റെ ഭാര്യയുടെ മന്ത്രിസ്ഥാനത്തിന് തടസ്സമാകുമെന്ന ചിലരുടെ ചിന്തയും, പാലക്കാട്ടെ മറ്റുചില നേതാക്കളും ചേര്‍ന്നാണ് തനിക്കും കുടുംബത്തിനുമെതിരേ കരുനീക്കം നടത്തിയതെന്നും ബാലന്‍ കേന്ദ്രനേതൃത്വത്തോട് പരാതിപ്പെട്ടിട്ടുണ്ട്.

അതേസമയം ഡോ. ജമീലയെ തരൂരില്‍ പരിഗണിക്കുന്നതിനെ ഒരുവിഭാഗം നേതാക്കള്‍ പാലക്കാട് ജില്ലാ സെക്രട്ടേറിയേറ്റില്‍ രൂക്ഷമായി എതിര്‍ത്തിരുന്നു.
സംവരണ മണ്ഡലത്തിലേക്ക് പി.കെ.എസ് ജില്ലാ നേതാക്കളുള്‍പ്പെടെ അര്‍ഹരായ സ്ഥാനാര്‍ഥികളുണ്ടായിട്ടും ബാലന്റെ ഭാര്യയെ പരിഗണിക്കുന്നതിനെയാണ് ഒരുവിഭാഗം നേതാക്കള്‍ എതിര്‍ത്തത്.
കുഴല്‍മന്ദം, തരൂര്‍ എന്നിവിടങ്ങളില്‍ നിന്നായി നാലുതവണ സഭയിലെത്തിയ എ.കെ.ബാലന്റെ ടേം പൂര്‍ത്തിയായതോടെ ബാലന്‍ ഇനി മത്സര രംഗത്തുണ്ടാവില്ലെന്ന് ഉറപ്പുണ്ടായിരുന്നു. ഈ ഘട്ടത്തിലാണ് സംസ്ഥാന നേതൃത്വത്തിന്റെ നിര്‍ദ്ദേശപ്രകാരമെന്നോണം ജില്ലാ സെക്രട്ടേറിയേറ്റില്‍ ഡോ. പി.കെ ജമീലയുടെ പേര് അവതരിപ്പിക്കപ്പെട്ടത്.

ജില്ലാ സെക്രട്ടേറിയറ്റ് അംഗങ്ങളായ പി.കെ ശശി, എം.ബി രാജേഷ്, സി.കെ ചാത്തുണ്ണി, വി.കെ ചന്ദ്രന്‍, വി. ചെന്താമരാക്ഷന്‍ എന്നിവരാണ് വിഷയത്തില്‍ എതിര്‍പ്പുമായി രംഗത്ത് വന്നിരുന്നത്.
എന്നാല്‍ ജില്ലാ സെക്രട്ടേറിയറ്റ് അംഗങ്ങള്‍ക്കൊപ്പം ചാലക ശക്തിയായി മുന്‍ എം.പിയും, മത്സരരംഗത്ത് ഭാര്യ ഉണ്ടായിരുന്ന മുതിര്‍ന്ന സി.പി.എം നേതാവുമായ ആള്‍ ചരടുവലിച്ചുവെന്നും ബാലന് പരാതിയുണ്ട്.