കൊച്ചി: കളമശേരിയില്‍ വിവിധയിടങ്ങളില്‍ പാചകവാതകത്തിന്റെ ഗന്ധം പടര്‍ന്നത് പരിഭ്രാന്തിയുണ്ടാക്കി. അദാനി കമ്പനിയുടെ ഗ്യാസ് പൈപ്പുകളിലെ അറ്റകുറ്റപ്പണിക്കിടെ ഉണ്ടായ ചോര്‍ച്ചയാണ് കാരണം. കങ്ങരപ്പടി, മെഡിക്കല്‍ കോളേജ്, തേവയ്ക്കല്‍, എച്ച്. എം.ടി. കോളനി തുടങ്ങിയ സ്ഥലങ്ങളിലൊക്കെ ദുര്‍ഗന്ധം അനുഭവപ്പെട്ടു. പലര്‍ക്കും ദേഹാസ്വാസ്ഥ്യമുണ്ടായി.

പാചകവാതകത്തിനു ഗന്ധം നല്‍കുന്ന ടെര്‍ട്ട് ബ്യൂട്ടൈല്‍ മെര്‍ക്കപ്റ്റണാണ് ഗന്ധമുണ്ടാകാന്‍ കാരണം. പ്രകൃതിവാതകത്തിന് ഗന്ധമില്ല. വാതകം ചോര്‍ന്നാല്‍ തിരിച്ചറിയാനാണ് ടെര്‍ട്ട് ബ്യൂട്ടൈല്‍ മെര്‍ക്കപ്റ്റണ്‍ ചേര്‍ക്കുന്നത്. ഗന്ധം ഉണ്ടെന്നത് ഒഴിച്ചാല്‍ മറ്റ് അപകട സാധ്യതകളില്ലെന്ന് കമ്പനി അധികൃതര്‍ അറിയിച്ചു.