ന്യൂഡല്‍ഹി: ചാറ്റ് ജിപിടി തടയുന്ന ആദ്യത്തെ പാശ്ചാത്യ രാജ്യമായി മാറി ഇറ്റലി. ഇറ്റാലിയന്‍ സര്‍ക്കാരിന് കീഴിലുള്ള സ്വകാര്യ നിരീക്ഷണ സമിതിയാണ് ഓപ്പണ്‍എഐയുടെ കീഴിലുള്ള ചാറ്റ്ജിപിടി രാജ്യത്ത് താത്കാലികമായി ബാന്‍ ചെയ്തത്. മൈക്രൊസോഫ്റ്റിന്റെ പിന്തുണയുള്ള ഓപ്പണ്‍എഐക്കെതിരെ അന്വേഷണം പ്രഖ്യാപിച്ചതിന് പിന്നാലെയാണ് നടപടി.ഇറ്റലിയിലെ ചാറ്റ്‌ബോട്ടിലേക്കുള്ള ആക്‌സസ് തടയുമെന്നും രാജ്യത്തിന്റെ ഡാറ്റാ പ്രൊട്ടക്ഷന്‍ അതോറിറ്റി വെള്ളിയാഴ്ച അറിയിച്ചു. അമേരിക്കന്‍ സ്റ്റാര്‍ട്ട് അപ്പായ ഓപ്പണ്‍എഐയുടെ സ്വകാര്യ വിവര ശേഖരണം പരിശോധിക്കുന്നതിനിടെയാണ് അറിയിപ്പ്.

ഇറ്റാലിയന്‍ ഉപയോക്താക്കളുടെ ഡാറ്റ കൈവശം വയ്ക്കുന്നതില്‍ നിന്ന് കമ്പനിയെ താല്‍ക്കാലികമായി പരിമിതപ്പെടുത്തുന്നതാണ് വാച്ച്‌ഡോഗിന്റെ നടപടി. ചാറ്റ്ജിപിടി വികസിപ്പിച്ച യുഎസ് ആസ്ഥാനമായ ഓപ്പണ്‍എഐ നടപടിയോട് പ്രതികരിച്ചിട്ടില്ല.ലോകമെമ്പാടുമുള്ള ചില പൊതുവിദ്യാലയങ്ങളും സര്‍വ്വകലാശാലകളും അവരുടെ പ്രാദേശിക നെറ്റ്‌വര്‍ക്കുകളില്‍ നിന്ന് ചാറ്റ്ജിപിടി വെബ്‌സൈറ്റ് ബ്ലോക്ക് ചെയ്തിരുന്നു. കോപ്പിയടി സംബന്ധിച്ചുള്ള ആശങ്കകള്‍ മൂലമായിരുന്നു ഇത്.