ന്യൂഡല്‍ഹി: ഒടുവില്‍ പുതിയ സി.ബി.ഐ ഡയറക്ടറെ നിയമിച്ചുള്ള ഉത്തരവ് പുറത്തുവന്നു. സി.ഐ.എസ്.എഫ് മേധാവിയായ സുബോധ് കുമാര്‍ ജെയ്‌സ്വാളിനാണ് പുതിയ നിയോഗം. മഹാരാഷ്ട്ര കേഡറില്‍ നിന്നുള്ള 1985 ബാച്ച് ഐ.പി.എസ് ഉദ്യോഗസ്ഥനായ സുബോധ് കുമാറിന് രണ്ടു വര്‍ഷത്തെ കാലാവധിയിലാണ് നിയമനം.

പുതിയ ഡയറക്ടറെ നിശ്ചയിക്കാന്‍ സുപ്രീംകോടതി ചീഫ് ജസ്റ്റിസ് എന്‍.വി.രമണ, പ്രധാനമന്ത്രി നരേന്ദ്ര മോദി, ലോക്‌സഭയിലെ ഏറ്റവും വലിയ കക്ഷിയായ കോണ്‍ഗ്രസിന്റെ സഭാനേതാവ് അധിര്‍ രഞ്ജന്‍ ചൗധരി എന്നിവര്‍ ഉള്‍പ്പെട്ട ഉന്നതതല സമിതിയുടെ യോഗം തിങ്കളാഴ്ച വൈകിട്ട് പ്രധാനമന്ത്രിയുടെ വസതിയില്‍ ചേര്‍ന്നിരുന്നു.

അസം, മേഘാലയ കേഡറിലെ 1984 ബാച്ച് ഐ.പി.എസ് ഓഫിസറും എന്‍.ഐ.എ ഡയറക്ടര്‍ ജനറലുമായ വൈ.സി. മോദി, ബി.എസ്.എഫ് ഡയറക്ടര്‍ ജനറലായ ഗുജറാത്ത് കേഡര്‍ ഓഫിസര്‍ രാകേഷ് അസ്താന തുടങ്ങിയവരായിരുന്നു പരിഗണന ലിസ്റ്റിലെ മുന്‍നിരക്കാര്‍.