മസ്‌കത്ത്: ട്വിറ്ററിലൂടെ ഫലസ്തീനികള്‍ക്കെതിരേ വിദ്വേഷപ്രചാരണം നടത്തിയ ഇന്ത്യന്‍ അധ്യാപകന് ഒമാനിലെ ജോലി നഷ്ടമായി. നാഷനല്‍ യൂനിവേഴ്‌സിറ്റി ഓഫ് സയന്‍സ് ആന്‍ഡ് ടെക്‌നോളജിയിലെ അധ്യാപകനായ ഡോ. സുധീര്‍ കുമാര്‍ ശുക്ലയെയാണ് ജോലിയില്‍ നിന്ന് പിരിച്ചുവിട്ടത്.

ഫലസ്തീനില്‍ ഇസ്‌റാഈല്‍ നടത്തിയ മനുഷ്യക്കുരുതിയെ അനുകൂലിച്ചും ഇസ്‌റാഈലിനു പിന്തുണ പ്രഖ്യാപിച്ചുമാണ് ഇയാള്‍ ട്വീറ്റിയത്. ഇതോടെ ഇയാളുടെ വിദ്യാര്‍ഥികള്‍ അടക്കമുള്ളവര്‍ പ്രതിഷേധവുമായി രംഗത്തെത്തി. എന്നാല്‍ അപ്പോഴും തന്റെ പോസ്റ്റുകളെ ന്യായീകരിക്കുകയായിരുന്നു ഈ അധ്യാപകന്‍. തുടര്‍ന്ന് വിദ്യാര്‍ഥികള്‍ അധ്യാപകന്റെ ക്ലാസുകള്‍ ബഹിഷ്‌കരിക്കുന്ന സ്ഥിതി വന്നതോടെയാണ് സര്‍വകലാശാല അധികൃതര്‍ അധ്യാപകനെ പിരിച്ചുവിട്ടത്.
ജോലി പോകുമെന്നായതോടെ സുധീര്‍ കുമാര്‍ തന്റെ പോസ്റ്റുകള്‍ പിന്‍വലിക്കുകയും മാപ്പുചോദിക്കുകയും ചെയ്‌തെങ്കിലും പ്രതിഷേധം അടങ്ങിയില്ല.

അവസാനം ഇയാള്‍ തന്റെ ട്വിറ്റര്‍ അക്കൗണ്ട് പൂര്‍ണമായി നീക്കംചെയ്തു.
നേരത്തെ ഇന്ത്യയിലെ സി.എ.എ-എന്‍.ആര്‍.സി വിരുദ്ധ സമരങ്ങള്‍ക്കെതിരേയും ഈ അധ്യാപകന്‍ വിദ്വേഷപൂര്‍ണമായ ട്വീറ്റുകള്‍ പോസ്റ്റ് ചെയ്തിരുന്നു. വിഷയം ശ്രദ്ധയില്‍ പെട്ടതോടെ ചില ഒമാന്‍ സ്വദേശികള്‍ ഇന്ത്യന്‍ എംബസിയെ സമീപിച്ചിരുന്നു.
സാമൂഹ്യമാധ്യമങ്ങള്‍ വഴിയുള്ള വിദ്വേഷപ്രചാരണങ്ങള്‍ക്കെതിരേ എംബസി പ്രചാരണം തുടങ്ങിയിട്ടുണ്ട്. രാജ്യത്തെ ഇന്ത്യന്‍ പ്രവാസികള്‍ ഒമാന്‍ നിയമങ്ങള്‍ പാലിക്കുകയും ഇരു രാജ്യങ്ങളും തമ്മിലെ സൗഹൃദം ശക്തിപ്പെടുത്താന്‍ ശ്രമിക്കുകയും ചെയ്യണമെന്ന് എംബസി നിര്‍ദേശിച്ചു. അഞ്ചുലക്ഷത്തോളം ഇന്ത്യക്കാര്‍ ഒമാനില്‍ ജോലി ചെയ്യുന്നുണ്ട്. ഇതില്‍ കൂടുതലും മലയാളികളാണ്.