കോട്ടയം: കേരള ഫുട്‌ബോളിനെ വാണിജ്യ പങ്കാളിക്ക് പൂര്‍ണമായും അടയറ വെയ്ക്കുന്ന നീക്കവുമായി കെ.എഫ്.എ മുന്നോട്ടു പോകുമ്പോള്‍ ഗോവയിലും പശ്ചിമ ബംഗാളിലും നിയന്ത്രണം അസോസിയേഷനുകളുടെ കൈകളില്‍ ഭദ്രം. ടൂര്‍ണമെന്റുകളുടെ നടത്തിപ്പും തത്സമയ സംപ്രേഷണവും സ്‌പോണ്‍സര്‍മാരെ കണ്ടെത്തലുമാണ് വാണിജ്യ പങ്കാളിയുടെ ചുമതല.

അസോസിയേഷനുകളുടെ അധികാര പരിധിയില്‍ കൈകടത്താനാവില്ല. 14 കോടി രൂപയ്ക്കാണ് അക്കോര്‍ഡ് സ്‌പോര്‍ട്‌സ് വി.ഡി.കെ എന്ന സ്ഥാപനത്തിന് ബംഗാളിലെ ഇന്ത്യന്‍ ഫുട്‌ബോള്‍ അസോസിയേഷന്‍ (ഐ.എഫ്.എ) കരാര്‍ നല്‍കിയത്. കഴിഞ്ഞ വര്‍ഷമായിരുന്നു നാല് സീസണിലേക്കുള്ള കരാര്‍ നിലവില്‍ വന്നത്. പരസ്യ രംഗത്ത് 30 വര്‍ഷ പാരമ്പര്യമുള്ള സ്ഥാപനമാണ് അക്കോര്‍ഡ് സ്‌പോര്‍ട്‌സ് വി.ഡി.കെ. ഗോവ പ്രഫഷനല്‍ ലീഗില്‍ മാത്രം വാണിജ്യ പങ്കാളിയാവാന്‍ 1.20 കോടിയാണ് ഇതേ സ്ഥാപനം ഗോവ ഫുട്‌ബോള്‍ അസോസിയേഷന് വാഗ്ദാനം ചെയ്തത്. മൂന്ന് സീസണുകളിലേക്കു ആദ്യ വര്‍ഷം 30 ലക്ഷവും തുടര്‍ന്നുള്ള രണ്ടു സീസണുകളില്‍ 40, 50 ലക്ഷം വീതവുമായിരുന്നു വാഗ്ദാനം. എന്നാല്‍, കേരള ഫുട്‌ബോളിലെ എല്ലാ അവകാശങ്ങളും 12 വര്‍ഷത്തേക്ക് തീറെഴുതുന്ന രീതിയാലാണ് മീരാന്‍ സ്‌പോര്‍ട്‌സ് ആന്‍ഡ് സ്‌കോര്‍ലൈന്‍ കണ്‍സോര്‍ഷ്യവുമായി കരാര്‍ ഉണ്ടാക്കാനുള്ള കരട് കെ.എഫ്.എ തയ്യാറാക്കി ഭാരവാഹി യോഗത്തില്‍ അവതരിപ്പിച്ചത്. പ്രതിവര്‍ഷം ലഭിക്കുന്നതാകട്ടെ 85 ലക്ഷവും. വാണിജ്യപങ്കാളിയെ കണ്ടെത്താനുള്ള കെ.എഫ്.യുടെ ബിഡില്‍ മൂന്ന് കമ്പനികള്‍ മാത്രമാണ് പങ്കെടുത്തത്. ഇതു മൂന്നിന്റെയും ഉടമയും ഒരാള്‍ തന്നെ. ദേശീയതലത്തില്‍ പ്രചാരണം നല്‍കാതെയാണ് വാണിജ്യപങ്കാളിയെ തേടിയുള്ള ബിഡ് ക്ഷണിച്ചതെന്ന ആരോപണവും ഉയര്‍ന്നിട്ടുണ്ട്.

കരാറില്‍ മാറ്റങ്ങള്‍
വരുത്തിയേക്കും

കോട്ടയം: വാണിജ്യപങ്കാളിക്കായി തയ്യാറാക്കിയ കരട് കരാറിലെ നിബന്ധനകള്‍ വിവാദമായതോടെ ചെറിയ മാറ്റങ്ങള്‍ വരുത്തി നടപ്പാക്കാന്‍ നീക്കം. കരാറിന്റെ പകര്‍പ്പുകള്‍ എക്‌സിക്യൂട്ടീവ് അംഗങ്ങള്‍ക്ക് കെ.എഫ്.എ ഇന്ന് നല്‍കും. നിബന്ധനകള്‍ പരിശോധിച്ച് അഭിപ്രായങ്ങള്‍ അറിയിക്കാനാണ് നിര്‍ദേശിച്ചിരിക്കുന്നത്. ഇതിന് ശേഷം ഓണ്‍ലൈനില്‍ എക്‌സിക്യൂട്ടീവ് കമ്മിറ്റി യോഗം ചേര്‍ന്ന് കരാറിന് അംഗീകാരം നല്‍കിയ ശേഷം ജനറല്‍ ബോഡിയില്‍ അവതരിപ്പിക്കും. വിവാദമായ കരാറിന്റെ കരടിനെതിരേ ശക്തമായ പ്രതിഷേധമാണ് ഫുട്‌ബോള്‍ മേഖലയില്‍ നിന്ന് ഉയരുന്നത്.