കോഴിക്കോട്: ഓടുന്ന ട്രെയിനില്‍ അജ്ഞാതന്‍ തീകൊളുത്തിയ സംഭവം നടന്ന പാളത്തിന് സമീപം മൂന്ന് മൃതദേഹങ്ങൾ കണ്ടെത്തി. ഒരു പുരുഷന്‍റേയും സ്ത്രീയുടെയും കുട്ടിയുടെയും മൃതദേഹമാണ് കണ്ടെത്തിയത്. ട്രെയിനില്‍ തീ പടര്‍ന്നപ്പോൾ പുറത്തേക്ക് ചാടിയവരുടേതാണ് മൃതദേഹമെന്ന് സംശയിക്കുന്നു. മട്ടന്നൂർ സ്വദേശി റഹ്മത്ത്, സഹോദരിയുടെ മകൾ സഹ്ല എന്നിവരാണ് മരിച്ചത്. മരിച്ച പുരുഷനെ തിരിച്ചറിഞ്ഞിട്ടില്ല.

സംഭവത്തിനിടെ യുവതിയേയും ബന്ധുവായ കുഞ്ഞിനേയും കാണാതായെന്ന് നേരത്തെ റിപ്പോര്‍ട്ടുണ്ടായിരുന്നു. ആകെ ഒമ്പത് പേര്‍ക്ക് പൊള്ളലേറ്റു. ഇതില്‍ രണ്ട് പേരുടെ നില ഗുരുതരമാണ്.

ആലപ്പുഴ - കണ്ണൂര്‍ എക്‌സിക്യുട്ടിവ് എക്‌സ്പ്രസിൽ  ഡി1 കംപാര്‍ട്‌മെന്റിലാണ് യാത്രക്കാരന്‍ തീയിട്ടത്. മൂന്നു സ്ത്രീകള്‍ ഉള്‍പ്പെടെ അഞ്ച് യാത്രക്കാര്‍ക്ക് പൊള്ളലേറ്റു. ഇവരെ ആശുപത്രിയിലേക്ക് മാറ്റി. സഹയാത്രികരുമായി ഉണ്ടായ വഴക്കിനെ തുടര്‍ന്നാണ് ഇയാള്‍ ട്രെയിനിനുള്ളില്‍ തീയിട്ടതെന്നാണ് വിവരം.