പ്രത്യേക ലേഖകൻ
തിരുവനന്തപുരം
സാനിറ്ററി, ബയോമെഡിക്കൽ മാലിന്യങ്ങൾ വീട്ടിലെത്തി ശേഖരിക്കാൻ ഹരിത കർമസേന. എറണാകുളം, ആലപ്പുഴ ജില്ലകളിലെ ഏഴ് തദ്ദേശ സ്ഥാപനങ്ങളിൽ ആരംഭിച്ച പദ്ധതി സംസ്ഥാന വ്യാപകമായി നടപ്പാക്കാനൊരുങ്ങുകയാണ് സർക്കാർ.
വീടുകൾ, അപ്പാർട്ട്‌മെന്റുകൾ, ഹോസ്റ്റലുകൾ, ലോഡ്ജുകൾ, ഹോട്ടലുകൾ എന്നിവിടങ്ങളിൽനിന്ന് സാനിറ്ററി നാപ്കിനുകൾ, കുട്ടികളും മുതിർന്നവരും ഉപയോഗിച്ച ഡയപ്പറുകൾ, കാലാവധി കഴിഞ്ഞ ഗുളികൾ, മെഡിസിൻ സ്ട്രിപ്പുകൾ, സിറിഞ്ചുകൾ, സൂചികൾ, പ്ലാസ്റ്റിക് അല്ലെങ്കിൽ ഗ്ലാസ് എന്നിവയുടെ മരുന്ന് കുപ്പികൾ എന്നിവ ഹരിതകർമ സേനയോ തദ്ദേശ സ്ഥാപനങ്ങൾ നിയോഗിച്ചിട്ടുള്ള മറ്റ് ഏജൻസികളോ ശേഖരിച്ച് കൊച്ചിയിലെ കേരള എൻവിറോ ഇൻഫ്രാസ്ട്രക്ചർ ലിമിറ്റഡിൽ (കെ.ഇ.ഐ.എൽ) എത്തിക്കും. ഇവരാണ് സംസ്‌കരിക്കുക.

ബയോമെഡിക്കൽ, സാനിറ്ററി മാലിന്യങ്ങൾ ശേഖരിക്കുന്നതിനും സംഭരിക്കുന്നതിനും സംസ്‌കരിക്കുന്നതിനുമുള്ള മാർഗ നിർദേശങ്ങൾ തദ്ദേശ സ്വയംഭരണ വകുപ്പ് അടുത്തിടെ പുറത്തിറക്കിയിരുന്നു.
വീടുകളിൽനിന്നു മാലിന്യം ശേഖരിക്കുന്ന സമയത്ത് ഒരു കിലോയ്ക്ക് 50 രൂപയും ജി.എസ്.ടിയും വീട്ടുകാർ നൽകണം.
മാലിന്യം ശേഖരിക്കുന്ന ഏജൻസികൾക്ക് തദ്ദേശ സ്ഥാപനങ്ങൾ നൽകിയ ലൈസൻസ് നമ്പറും മുദ്രയും ഉണ്ടായിരിക്കണം. ഖരമാലിന്യ സംസ്‌കരണത്തിൽ സ്വകാര്യ ഏജൻസികൾക്ക് കുറഞ്ഞത് മൂന്ന് വർഷത്തെ പരിചയമുണ്ടായിരിക്കണം.
ആധുനിക സാങ്കേതികവിദ്യകൾ ഉപയോഗിക്കുന്ന സ്റ്റാർട്ടപ്പുകളും കമ്പനികളും പ്രവൃത്തിപരിചയത്തിൽ നിന്ന് ഒഴിവാക്കിയിട്ടുണ്ട്. മാലിന്യം ശേഖരിക്കുന്നതിനായി വീടുകളിൽ വിവിധ നിറത്തിലുള്ള ബാഗുകൾ എത്തിക്കും.

തിരഞ്ഞെടുത്ത ഏജൻസിക്ക് മാലിന്യം കൊണ്ടുപോകൽ, ജീവനക്കാരുടെ ശമ്പളം, കെ.ഇ.ഐ.എല്ലിന് നൽകൽ എന്നിവയുടെ ഉത്തരവാദിത്വമാണ്. ഒരു കിലോമാലിന്യം സംസ്‌കരിക്കുന്നതിന് 28.50 രൂപയാണ് കെ.ഇ.ഐ.എൽ ഈടാക്കുന്നത്.
ജി.പി.എസ് സംവിധാനമുള്ള വാഹനങ്ങളിലായിരിക്കണം മാലിന്യ ശേഖരിച്ചു കൊണ്ടുപോകേണ്ടത്. ബയോമെഡിക്കൽ മാലിന്യങ്ങൾ തദ്ദേശ സ്ഥാനങ്ങളുടെ അംഗീകാരമില്ലാത്ത ഏജൻസികൾക്ക് കൈമാറുന്നതിൽ നിന്ന് വീടുകൾ, അപ്പാർട്ടുമെന്റുകൾ, സ്ഥാപനങ്ങൾ എന്നിവയെ വിലക്കിയിട്ടുണ്ട്. ഇവ കത്തിക്കുന്നതോ അശ്രദ്ധമായി വലിച്ചെറിയുന്നതോ കണ്ടെത്തിയാൽ പിഴയും ശിക്ഷയും അനുഭവിക്കേണ്ടി വരും.