അബുദാബി: റമദാനിൽ ആളുകൾ സാധനങ്ങൾ ധാരാളമായി വാങ്ങുന്നത് മുതലെടുത്ത് വിലകയറ്റം നടത്തുന്നത് യുഎഇയിൽ ഏറെ ചർച്ചകൾക്ക് വഴിയൊരുക്കുന്നു. വിലകയറ്റം ഉണ്ടായതോടെ സാധാരണക്കാർ ഏറെ ബുദ്ധിമുട്ടിലായി. ഈ സാഹചര്യത്തിൽ വിലനിയന്ത്രണം സംബന്ധിച്ച് ഭരണകൂടം കൃത്യമായ നിയമ നിർമാണത്തിനൊരുങ്ങുകയാണ്.

അവശ്യ സാധനങ്ങളുടെ വില നിയന്ത്രിക്കാനുള്ള പുതിയ നയം ഉടൻ നടപ്പാക്കുമെന്ന് യുഎഇ സാമ്പത്തിക മന്ത്രി അബ്ദുല്ല ബിൻ തൂഖ് വ്യക്തമാക്കി. പുതിയ നിയമം സംബന്ധിച്ചുള്ള പഠനം അന്തിമഘട്ടത്തിലേക്ക് നീങ്ങുകയാണ്. ഇതുവരുന്നതോടെ വിലക്കയറ്റം പിടിച്ചു നിർത്താനാകും. വിപണി നിരക്കുകൾ ന്യായമാണെന്നുറപ്പാക്കാനും വില നിശ്ചയിക്കുന്നതിലെ അശാസ്ത്രീയത തടയാനും ഇതുവഴി സാധിക്കുമെന്നും മന്ത്രി വ്യക്തമാക്കി.

പുതിയനയം എല്ലാത്തരം ആളുകൾക്കും ഗുണപ്രദമാകും. ഉൽപാദകർ, ഉപഭോക്താക്കൾ, വിതരണക്കാർ എന്നിവർക്കെല്ലാം ഒരേപോലെ ഗുണകരമാകുന്നതായിരിക്കും പുതിയ നയം. സ്ഥിരവും ന്യായവുമായ വില നിലനിർത്തേണ്ടത് പ്രധാനമാണെന്ന് അബ്ദുല്ല ബിൻ തൂഖ് ചൂണ്ടിക്കാട്ടി.

മാർച്ചിൽ യുഎഇയിലെ 9 ഉൽപാദകരുടെ കോഴി, മുട്ട ഉൽപന്നങ്ങൾക്ക് 13 ശതമാനം വില വർധിപ്പിക്കാൻ താൽക്കാലിക അനുമതി നൽകിയിരുന്നു. ആറു മാസത്തിനു ശേഷം പുനഃപരിശോധിക്കാവുന്ന തരത്തിലായിരുന്നു അനുമതി. ഏതാനും ചില ബ്രാൻഡുകളിലുള്ളവയ്ക്ക് മാത്രമാണ് വില വർധന ഉണ്ടായത്. എന്നാൽ ഇതുമുതലെടുത്ത് പലരും മറ്റു സാധനങ്ങൾക്കും വിലവർധിപ്പിച്ചത് സാധാരണക്കാർക്ക് തിരിച്ചടിയായി.

അതേസമയം, അന്യായ വിലവർധന തടയാനും കുത്തക സമ്പ്രദായങ്ങളെ പ്രതിരോധിക്കാനുമുള്ള നടപടി ശക്തിപ്പെടുത്തുമെന്ന് അധികൃതർ അറിയിച്ചു.

കൂടുതല്‍ ഗള്‍ഫ് വാര്‍ത്തകള്‍ ലഭിക്കാന്‍ സുപ്രഭാതം വാട്‌സാപ്പ് കമ്യൂണിറ്റിയില്‍ ജോയിന്‍ ചെയ്യുക: https://chat.whatsapp.com/HVpI8bKnwZA7O8fvza77sv