മലപ്പുറം: ന്യൂനപക്ഷ സ്‌കോളര്‍ഷിപ്പില്‍ 80:20 അനുപാതം കോടതി റദ്ദാക്കിയ പശ്ചാത്തലത്തില്‍ രണ്ടു നിലപാടുകളിലായ ഭരണകക്ഷി നേതാക്കളെ ചോദ്യംചെയ്ത് മുന്‍ വിദ്യാഭ്യാസ മന്ത്രി പി.കെ അബ്ദുറബ്ബ്. പൂര്‍ണമായും മുസ്‌ലിംകള്‍ക്ക് ലഭിക്കേണ്ട പദ്ധതിയില്‍ 20 ശതമാനം പിന്നാക്ക ക്രിസ്ത്യാനികള്‍ക്ക് നീക്കിവച്ചത് യു.ഡി.എഫ് ആണെന്ന് എം.എ ബേബി പറയുന്നു. എന്നാല്‍ 2011 ല്‍ വി.എസ് സര്‍ക്കാരിന്റെ കാലത്താണെന്നാണ് കെ.ടി ജലീല്‍ പറയുന്നത്. രണ്ടുപേരും ഇങ്ങനെ ഉരുണ്ടുകളിച്ചാല്‍ ചിലര്‍ക്കത് ക്യാപ്‌സൂളാവുമെന്നും അബ്ദുറബ്ബ് ചൂണ്ടിക്കാട്ടുന്നു.

കെ.ടി ജലീലും എം.എ ബേബിയും ഫെയ്‌സ്ബുക്കില്‍ പങ്കുവച്ച കുറിപ്പുകള്‍ ചൂണ്ടിക്കാട്ടിയാണ് അബ്ദുറബ്ബിന്റെ വിമര്‍ശനം. ക്യാപ്‌സൂളുകള്‍ കൊണ്ട് മാത്രം കാര്യമില്ലെന്നും മേജര്‍ ഓപ്പറേഷന്‍ തന്നെ ആവശ്യമാണെന്നും അബ്ദുറബ്ബ് ഫെയ്‌സ്ബുക്കില്‍ കുറിച്ചു. ഹൈക്കോടതി വിധിക്കെതിരെ സര്‍ക്കാര്‍ വേഗത്തില്‍ അപ്പീല്‍ പോകണമെന്നും അബ്ദുറബ്ബ് പറഞ്ഞു.

അബ്ദുറബ്ബിന്‍റെ പോസ്റ്റ്

80:20 അനുപാതം 2011 ഫെബ്രവരിയില്‍ വി.എസ് സര്‍ക്കാറിന്റെ കാലത്ത് തന്നെ ഉത്തരവിറക്കിയെന്ന് K.T. ജലീല്‍
പൂര്‍ണ്ണമായും മുസ്ലിം ന്യൂനപക്ഷങ്ങള്‍ക്ക് ലഭിക്കേണ്ട പദ്ധതിയില്‍ 20% പിന്നാക്ക കൃസ്ത്യാനികള്‍ക്ക് നീക്കി വെച്ചത് 2015 ല്‍ UDF സര്‍ക്കാറാണെന്ന് എം.എം ബേബി.
സത്യത്തില്‍ കെ.ടി.ജലീല്‍ മറുപടി പറയുന്നത് ലീഗുകാര്‍ക്കാണോ, അതോ എം.എ.ബേബിക്കോ?
അതല്ല, എം.എ.ബേബി മറുപടി പറയുന്നത് ലീഗുകാര്‍ക്കാണോ, അതോ K.T.ജലീലിനോ?
രണ്ടു പേരും ഇങ്ങനെ
ഉരുണ്ടുകളിച്ചാല്‍ ചിലര്‍ക്കത് കാപ്‌സ്യൂളാവും, കാപ്‌സ്യൂളുകള്‍ കൊണ്ട് മാത്രം കാര്യമില്ലല്ലോ,
മേജര്‍ ഓപ്പറേഷന്‍ തന്നെ വേണ്ടേ..!
അതു കൊണ്ട് കോടതി വിധിക്കെതിരെ
സര്‍ക്കാര്‍ വേഗം അപ്പീല്‍ പോകണം.