കോഴിക്കോട്: സച്ചാര്‍ കമ്മിറ്റിയുടെ അടിസ്ഥാനത്തില്‍ കേരളത്തില്‍ നടപ്പാക്കിയ മുസ്‌ലിംകള്‍ക്ക് മാത്രമായുള്ള സ്‌കോളര്‍ഷിപ്പ് മുഴുവനായും പുനഃസ്ഥാപിക്കാന്‍ സംസ്ഥാന സര്‍ക്കാര്‍ അപ്പീല്‍ നല്‍കണമെന്ന് എസ്.കെ.എസ്.എസ്.എഫ് സംസ്ഥാന ജനറല്‍ സെക്രട്ടറി സത്താര്‍ പന്തലൂര്‍ ആവശ്യപ്പെട്ടു. സംഘടനയുടെ സാംസ്‌കാരിക വിഭാഗമായ മനീഷയുടെ ആഭിമുഖ്യത്തില്‍ 'ന്യൂനപക്ഷ പദ്ധതികള്‍ കൈയേറിയതാര്?' 

വിഷയത്തില്‍ നടന്ന സെഷനില്‍ സംസാരിക്കുകയായിരുന്നു അദ്ദേഹം.മുസ്‌ലിംകള്‍ക്കു വേണ്ടി മാത്രം നടപ്പാക്കിയ സ്‌കോളര്‍ഷിപ്പില്‍ പില്‍ക്കാലത്ത് മറ്റു വിഭാഗങ്ങളെ ചേര്‍ത്തതാണ് അനാവശ്യമായ അവകാശവാദങ്ങള്‍ക്കു കാരണമായത്. കേരളത്തിന്റെ സാമൂഹിക ഘടനയെപ്പോലും വെല്ലുവിളിക്കുംവിധം ഒരു വിഭാഗം മതസ്പര്‍ധ വളര്‍ത്തിയും കള്ളക്കഥകള്‍ പ്രചരിപ്പിച്ചും മുസ്‌ലിംകളുടെ അവകാശങ്ങളെ കവര്‍ന്നെടുക്കുന്നത് അംഗീകരിക്കാനാവില്ല. വിഷയത്തില്‍ ധവളപത്രം പ്രസിദ്ധീകരിച്ചും മറ്റു നടപടികള്‍ സ്വീകരിച്ചും കുപ്രചാരണങ്ങള്‍ സര്‍ക്കാര്‍ തടയണം.

ഇല്ലാത്ത ലൗ ജിഹാദ് പ്രചരിപ്പിച്ചപ്പോള്‍ പോലും മതം മാറിയവര്‍ക്ക് മാത്രമായി പ്രത്യേകം സര്‍ക്കാര്‍ ഫണ്ട് ഉപയോഗിച്ച് വിവിധ പദ്ധതികള്‍ ആവിഷ്‌കരിച്ചതില്‍ ഇതര മതവിഭാഗങ്ങള്‍ അസഹിഷ്ണുത കാണിക്കാത്തത് അവരുടെ ഔചിത്യബോധം കൊണ്ടാണ്. ഇത് ബന്ധപ്പെട്ടവര്‍ വിസ്മരിക്കരുതെന്നും അദ്ദേഹം ഓര്‍മപ്പെടുത്തി.