സ്വന്തം ലേഖകന്‍
തിരുവനന്തപുരം: സംസ്ഥാനത്ത് കൊവിഡ് മരണം സ്ഥിരീകരിക്കുന്നതിലെ കാലതാമസത്തിന് ഇനിയും പരിഹാരമില്ല.
പത്തുദിവസത്തിലധികം സമയമെടുത്ത നിരവധി കേസുകളാണ് പ്രതിദിനം റിപ്പോര്‍ട്ട് ചെയ്യുന്നതെന്ന് ആരോഗ്യവകുപ്പിന്റെ തന്നെ വെബ്‌സൈറ്റ് വ്യക്തമാക്കുന്നു.ശനിയാഴ്ച 198 കൊവിഡ് മരണങ്ങളാണ് ആരോഗ്യവകുപ്പ് സ്ഥിരീകരിച്ചത്. ഇതില്‍ 62 മരണങ്ങള്‍ പത്തുദിവസങ്ങള്‍ക്കു മുന്‍പ് നടന്നതാണ്. ഇതില്‍ ഈ മാസം ഒന്നിനു നടന്ന മരണം വരെ ഉള്‍പ്പെടുന്നുണ്ട്.

ഈ മാസം ഒന്നിനു മരിച്ച എറണാകുളം സ്വദേശി 91 കാരിയുടെ മരണം 29നാണ് സ്ഥിരീകരിച്ചത്. മേയ് ഏഴിന് നടന്ന തിരുവനന്തപുരം സ്വദേശിയായ 86 കാരന്റെ മരണവും മൂന്നി ന് നടന്ന എറണാകുളം സ്വദേശിയായ 63 കാരന്റെ മരണവും ഒന്‍പതിന് നടന്ന എറണാകുളം സ്വദേശിനിയായ 56 കാരിയുടെ മരണവും 29നാണ് സ്ഥിരീകരിച്ചത്.

മലപ്പുറം ജില്ലയില്‍ ഈ മാസം മൂന്നിന് നടന്ന 75 കാരന്റെ മരണവും അഞ്ചിനു നടന്ന അഞ്ചു പേരുടെ മരണവും എട്ടിനു നടന്ന മൂന്നു പേരുടെ മരണവും നാലിനു നടന്ന എട്ടു പേരുടെ മരണവും ഈ മാസം 29നാണ് സ്ഥിരീകരിച്ചത്.
ഈ മാസം 28ന് സ്ഥിരീകരിച്ച 194 മരണങ്ങളില്‍ 25 മരണങ്ങള്‍ മെയ് പത്തിനുള്ളില്‍ നടന്നതാണ്. സംശയമുള്ള കേസുകളില്‍ തീരുമാനമെടുക്കുന്നത് വൈകുന്നതിനാലാണ് മരണം സ്ഥിരീകരിക്കുന്നതില്‍ കാലതാമസമുണ്ടാകുന്നതെന്നാണ് ആരോഗ്യവകുപ്പിന്റെ വിശദീകരണം.