മലപ്പുറം: മലപ്പുറത്ത് നായാട്ടിനിടെ യുവാവ് വെടിയേറ്റുമരിച്ച സംഭവം കൊലപാതകമാണെന്ന് പൊലിസ്. ചട്ടിപ്പറമ്പില്‍ സാനു എന്ന ഇര്‍ഷാദ് മരിച്ച സംഭവമാണ് കൊലപാതകമെന്നു പൊലിസ് പറയുന്നത്. കേസില്‍ രണ്ടുപേരെ അറസ്റ്റ് ചെയ്തു. പെരിന്തല്‍മണ്ണ സ്വദേശികളായ അസ്‌കര്‍ അലി, സനീഷ് എന്നിവരെയാണ് അറസ്റ്റ് ചെയ്തത്.
നായാട്ടിനിടെ അബദ്ധത്തില്‍ വെടിയേറ്റതെന്നായിരുന്നു ആദ്യ നിഗമനം. എന്നാല്‍ കൂടുതല്‍ അന്വേഷണത്തിനിടെയാണ് കൊലപാതകമാണെന്ന് കണ്ടെത്തിയതെന്ന് പൊലിസ് പറയുന്നു.

കഴിഞ്ഞ ദിവസം പന്നിവേട്ടക്കിടെയാണ് ചട്ടിപ്പറമ്പ് സ്വദേശി സാനു വെടിയേറ്റ് മരിച്ചത്. ചട്ടിപ്പറമ്പില്‍ കാട് പിടിച്ച സ്ഥലത്ത് പന്നിയെ വേട്ടയാടാന്‍ പോയപ്പോഴാണ് യുവാവിന് വെടിയേറ്റത്. അറസ്റ്റിലായവരെ ചോദ്യം ചെയ്യുകയാണെന്നും നായാട്ട് സംഘത്തില്‍ കൂടുതല്‍ പേര്‍ ഉണ്ടായിരുന്നുവെന്നും പൊലിസ് പറഞ്ഞു. മറ്റ് പ്രതികള്‍ക്കായുള്ള തിരച്ചില്‍ ഊര്‍ജ്ജിതമാക്കിയതായും പൊലീസ് അറിയിച്ചു.