പാറക്കടവ്: കോഴിക്കോട് ജില്ലയിലെ ചെക്യാട്, തൂണേരി പഞ്ചായത്തുകളെയും കണ്ണൂര്‍ ജില്ലയിലെ തൃപ്പങ്ങോട്ടൂര്‍ പഞ്ചായത്തിനെയും ബന്ധിപ്പിക്കുന്ന ചേടിയാലകടവ് പാലത്തിന് ടെന്‍ഡര്‍ അനുമതി ലഭിച്ചു. 2016 മെയ് മാസത്തില്‍ പി.ഡബ്ല്യൂ.ഡി നോര്‍ത്ത് സര്‍ക്കിള്‍ സൂപ്രണ്ട് എന്‍ജിനീയര്‍ നോട്ടിഫിക്കേഷന്‍ ഇറക്കിയ പ്രീക്വാളിഫൈഡ് ടെന്‍ഡറിലാണു കരാര്‍ തീരുമാനമായത്. ഇതോടെ കോഴിക്കോട് എസ്.ഇ തുടര്‍നടപടി ആരംഭിക്കാന്‍ മരാമത്ത് റോഡ്, പാലം വിഭാഗം എന്‍ജിനീയര്‍മാര്‍ക്കു നിര്‍ദേശം നല്‍കി.
അപ്രോച്ച് റോഡ്, അഴുക്കുചാല്‍, ഓവുപാലങ്ങള്‍, പാര്‍ശ്വഭിത്തി എന്നിവയും പാലത്തിനൊപ്പം നിര്‍മിക്കും. പദ്ധതി അംഗീകരിച്ച സംസ്ഥാന സര്‍ക്കാര്‍ 2015ല്‍ സ്ഥലമെടുപ്പ് ഉള്‍പ്പെടെ ഒന്‍പതു കോടി രൂപ ചെലവു വരുന്ന പദ്ധതിക്കു ഭരണാനുമതി നല്‍കിയിരുന്നു. ഇതോടെ സ്ഥലമെടുപ്പുമായി ബന്ധപ്പെട്ട ജോയിന്റ് ഇന്‍സ്‌പെക്ഷന്‍ പൂര്‍ത്തിയായിട്ടുണ്ട്. ചെക്യാട്, തൂണേരി, തൃപ്പങ്ങോട്ടൂര്‍ ഗ്രാമപഞ്ചായത്തുകള്‍ക്കും ജില്ലാ അതിര്‍ത്തിയായ ഉമ്മത്തൂരിനുമിടയില്‍ നാട്ടുകാര്‍ പണിത കമ്പിപ്പാലത്തിന് 200 മീറ്റര്‍ മുകളിലാണു പാലം പണിയുന്നത്. പ്രസ്തുത പാലത്തിന് 67 മീറ്റര്‍ നീളവും 8.40 മീറ്റര്‍ വീതിയുമുള്ളതിനാല്‍ രണ്ട് ബസുകള്‍ക്ക് ഒരേ സമയം ഇതിലൂടെ കടന്നുപോകാം.
തൂണേരി, മുടവന്തേരി ഭാഗത്തു നിന്ന് നാദാപുരം-പെരിങ്ങത്തൂര്‍ സംസ്ഥാനപാതയിലേക്ക് 2.100 കിലോമീറ്റര്‍ ദൂരം വരുന്ന റോഡ് പ്രധാനമന്ത്രി റോഡ് പദ്ധതിയില്‍ ഉള്‍പ്പെടുത്തി ഇതിനകം നിര്‍മിച്ചു കഴിഞ്ഞിട്ടുണ്ട്. തുടര്‍ന്ന് പാറക്കടവ്-കടവത്തൂര്‍ റോഡിനെ കുഞ്ഞിപ്പുരമുക്ക് റോഡുമായി ബന്ധിപ്പിക്കും.  നാദാപുരം, കൂത്തുപറമ്പ്, തലശ്ശേരി റോഡുകള്‍ക്കും ഈ പാലത്തില്‍ നിന്ന് കണക്ടിവിറ്റി ഉണ്ടാകും. ചെക്യാട്-അരീക്കരകുന്ന് ബി.എസ്.എഫ് കേന്ദ്രത്തിലേക്കും കണ്ണൂര്‍ വിമാനത്താവളത്തിലേക്കുമുള്ള എളുപ്പ മാര്‍ഗവുമാകുമിത്.