യുവേഫ ചാമ്പ്യന്‍സ് ലീഗിലെ ആദ്യ പാദ ക്വാര്‍ട്ടര്‍ ഫൈനല്‍ പോരാട്ടങ്ങള്‍ അവസാനിക്കുമ്പോള്‍ ഇന്റര്‍മിലാനും മാഞ്ചസ്റ്റര്‍ സിറ്റിക്കും പുറമെ ലീഡ് സ്വന്തമാക്കിയിരിക്കുകയാണ് ചെല്‍സിയും എ.സി മിലാനും. വ്യാഴാഴ്ച നടന്ന ഒന്നാം പാദ ക്വാര്‍ട്ടര്‍ ഫൈനല്‍ പോരാട്ടത്തിലാണ് ഇംഗ്ലീഷ്, ക്ലബ്ബായ ചെല്‍സിയെ തകര്‍ത്ത് സ്പാനിഷ് ക്ലബ്ബായ റയലും, ഇറ്റാലിയന്‍ ക്ലബ്ബായ നാപ്പോളിയെ തകര്‍ത്ത് നിലവിലെ സീരി എ ചാമ്പ്യന്‍മാരായ എ.സി മിലാനും വിജയം വരിച്ചത്.

കരിം ബെന്‍സെമ, മാര്‍ക്കോ അസന്‍സിയോ എന്നിവരുടെ ഗോളുകളുടെ മികവിലാണ് റയല്‍ ചെല്‍സിയെ പരാജയപ്പെടുത്തിയത്. മത്സരത്തില്‍ സമ്പൂര്‍ണ ആധിപത്യം പുലര്‍ത്തി മുന്നേറിയ റയലിനെതിരെ ഒരു ഘട്ടത്തിലും ആധിപത്യം പുലര്‍ത്താന്‍ ചെല്‍സിക്ക് സാധിച്ചിരുന്നില്ല.

കൂടാതെ മത്സരം 59 മിനിട്ട് പിന്നിട്ടപ്പോള്‍ ചെല്‍സിയുടെ ലെഫ്റ്റ് ബാക്കായ ബെന്‍ ചില്‍വെല്‍ ചുവപ്പ് കാര്‍ഡ് വാങ്ങി പുറത്ത് പോയതും ലണ്ടന്‍ ക്ലബ്ബിന് തിരിച്ചടിയായി.എന്നാല്‍ തുല്യ ശക്തികള്‍ തമ്മിലുള്ള പോരാട്ടം എന്നത് പോലെയാണ് നാപ്പോളിയും എസി മിലാനും തമ്മിലുള്ള മത്സരം മുന്നോട്ട് പോയത്. ബോള്‍ പൊസഷനിലും എതിര്‍ പോസ്റ്റിലേക്ക് മുന്നേറുന്നതിലുമൊക്കെ ഇരു ടീമുകളും ഏതാണ്ട് തുല്യത പുലര്‍ത്തി എന്ന് പറയാമെങ്കിലും വിജയ ഗോള്‍ ഉതിര്‍ക്കാന്‍ കഴിഞ്ഞത് മിലാനായിരുന്നു.

മിലാന്റെ പോസ്റ്റിലേക്ക് ആറ് ഷോട്ട് ഓണ്‍ ടാര്‍ഗറ്റ് പായിക്കാന്‍ കഴിഞ്ഞെങ്കിലും അതിലൊന്ന് പോലും ലക്ഷ്യത്തിലെത്തിക്കാന്‍ സാധിക്കാതിരുന്നതാണ് നാപ്പോളിക്ക് തിരിച്ചടിയായത്.

അതേസമയം ഏപ്രില്‍ 19നാണ് നാപ്പോളിമിലാന്‍, ചെല്‍സിറയല്‍ രണ്ടാം പാദ മത്സരം. ടൂര്‍ണമെന്റിലെ സെമി ഫൈനല്‍ പോരാട്ടങ്ങള്‍ മെയ് ഒമ്പത് മുതല്‍ ആരംഭിക്കും.