ന്യൂഡല്‍ഹി: ജാമ്യ വ്യവസ്ഥകളില്‍ ഇളവ് തേടി പി.ഡി.പി ചെയര്‍മാന്‍ അബ്ദുല്‍ നാസര്‍ മഅ്ദനി സമര്‍പ്പിച്ച ഹരജി സുപ്രിം കോടതി തിങ്കളാഴ്ചത്തേക്ക് മാറ്റി. കേരളത്തിലേക്ക് പോകാന്‍ അനുവദിക്കണമെന്നതായിരുന്നു ഹരജിയിലെ പ്രധാന ആവശ്യം. മഅ്ദനിക്കു വേണ്ടി മുതിര്‍ന്ന അഭിഭാഷകനായ കപില്‍ സിബലാണ് സുപ്രിംകോടതിയില്‍ ഹാജരായത്. മഅ്ദനിയുടെ ആരോഗ്യനില വഷളാണെന്ന് കപില്‍ സിബല്‍ കോടതിയെ അറിയിച്ചു. ആയുര്‍വേദ ചികിത്സക്കായി കേരളത്തിലേക്ക് പോകാന്‍ അനുവദിക്കണമെന്നാണ് ആവശ്യം. എട്ട് വര്‍ഷമായി തടവില്‍ തന്നെയാണ് കഴിയുന്നതെന്നും ഇതുവരെ ഒരു ജാമ്യം വ്യവസ്ഥയും ലംഘിച്ചിട്ടില്ലെന്നും മഅ്ദനി കോടതിയെ അറിയിച്ചു.

അതേസമയം മഅ്ദനിക്ക് ജാമ്യ വ്യവ്യവസ്ഥയില്‍ ഇളവു നല്‍കരുതെന്ന വാദത്തില്‍ ഉറച്ചു നില്‍ക്കുകയാണ് കര്‍ണാടക. കേസില്‍ ഒരു സത്യവാങ്മൂലം കൂടി സമര്‍പ്പിക്കാനുണ്ടെന്ന് കര്‍ണാടക സര്‍ക്കാര്‍ കോടതിയെ അറിയിച്ചു. ആയുര്‍വേദ ചികിത്സ നല്‍കണമെന്ന് ഡോക്ടര്‍മാര്‍ പറഞ്ഞിട്ടില്ല. സാക്ഷിയെ ഭീഷണിപ്പെടുത്തിയതിന് കേസുണ്ടെന്നും കര്‍ണാടക ഭീകര വിരുദ്ധ സെല്‍ സുപ്രിം കോടതിയില്‍ പറഞ്ഞു.

കേസ് വിചാരണ നടപടിയിലേക്ക് കടക്കുന്നതിനാല്‍ കര്‍ണാടകയില്‍ ഇനി തടവില്‍ കഴിയേണ്ട കാര്യമില്ലെന്ന് മഅ്ദനിക്കു വേണ്ടി ഹാജരായ അഡ്വ. ഹാരിസ് ബീരാന്‍ കഴിഞ്ഞ തവണ ചൂണ്ടിക്കാട്ടിയിരുന്നു. കുറച്ചുനാള്‍ മുന്‍പ് പക്ഷാഘാത ലക്ഷണങ്ങള്‍ കൊണ്ടുള്ള ശാരീരിക അസ്വസ്ഥതകളെ തുടര്‍ന്ന് മഅ്ദനിയെ ബംഗളൂരുവിലെ ആസ്റ്റര്‍ സി.എം.ഐ ആശുപത്രിയില്‍ പ്രവേശിപ്പിച്ചിരുന്നു. തുടര്‍ന്ന് എം.ആര്‍.ഐ സ്‌കാന്‍ ഉള്‍പ്പെടെയുള്ള വിവിധ പരിശോധനകള്‍ക്ക് വിധേയമാക്കി. പരിശോധനകളില്‍ ഹൃദയത്തില്‍ നിന്ന് തലച്ചോറിലേക്ക് പോകുന്ന പ്രധാന ഞരമ്പുകളില്‍ രക്തയോട്ടം വളരെ കുറഞ്ഞ രീതിയിലാണെന്നും അതിനാലാണ് ഇടവിട്ട് കൈകള്‍ക്ക് തളര്‍ച്ച, സംസാരശേഷി കുറയുക തുടങ്ങിയ പക്ഷാഘാത ലക്ഷണങ്ങള്‍ ഉണ്ടാകുന്നതെന്നും അത് പരിഹരിക്കാന്‍ ഉടന്‍ സര്‍ജറി വേണമെന്നും നിര്‍ദേശിച്ചിരുന്നു.